Bosh konsulxonadan olingan ma’lumotga ko‘ra, O.B. o‘tgan yili 15 dekabr kuni umra amallarini ado etish maqsadida Saudiya Arabistoniga kelgan. 31 dekabr kuni umra ibodatlari yakunlab, Makkadan Jidda xalqaro aeroportiga yetib kelganida o‘t pufagidagi og‘riqlar xuruji bois ushbu shahardagi King Abdullah Medical Complex kasalxonasiga joylashtirilgan. Shifoxonada uning buyrak va o‘t pufagida to‘plangan toshlar jarrohlik yo‘li bilan olib tashlangan.

Bemorning o‘g‘li B.A. Bosh konsulxonaga yo‘llagan murojaatida, otasini O‘zbekistonga olib ketish va shifoxona bilan yuzaga kelgan muammolarni hal etishda amaliy yordam berishni so‘rgan.

O‘zbekiston diplomatlari King Abdullah Medical Complex shifoxonasi mas’ullari bilan uchrashuv o‘tkazib, bemorning O‘zbekistonga qaytishi bilan bog‘liq hujjatlarni rasmiylashtirishga amaliy yordam ko‘rsatishdi. Shuningdek, bemorda o‘tkazilgan jarrohlik amaliyoti uchun to‘lov bilan bog‘liq masalalar ham tomonlar o‘rtasida ijobiy hal etildi.

Fuqaro Uzbekistan Airways samolyotida O‘zbekistonga kuzatib qo‘yildi.