Shvetsiya prokuraturasi Qur’onni yoqib yuborish tadbiri tashkilotchisi Salvon Momika o‘limida gumon qilinayotgan besh nafar shaxsni ozod etdi, deb xabar berdi AP.

«Ularning jinoyat sodir etganiga gumon zaiflashdi, endi odamlarni hibsda ushlab turish uchun hech qanday sabab ko‘rmayapman», dedi yuqori darajali prokuror Rasmus Ohman.

Prokuraturaning aniqlik kiritishicha, ulardan gumon olib tashlanmagan, huquq-tartibot idoralari xodimlari qotillik ortida kim turganini aniqlashda davom etmoqda.

Iroqlik migrant Salvon Momika 29 yanvar kuni Syodertelyye shahridagi turar-joylardan birida otib o‘ldirildi. U avvalroq, Qur’onni yoqib yuborish bilan bog‘liq bir qancha ommaviy tadbirlarni uyushtirgan edi. Tadbirlar mahalliy politsiya ruxsati bilan amalga oshirildi. Iroq hukumati Shvetsiyadan Momikani ekstraditsiya qilishni so‘radi, ammo rad javobini oldi. O‘nlab iroqliklar Bag‘doddagi Shvetsiya elchixonasi oldida norozilik namoyishini o‘tkazdi.