AQSh prezidenti Donald Tramp BRICS davlatlariga yangi valuta yaratish va dollardan voz kechishga urinishlari uchun 100 foizlik boj bilan tahdid qildi.

Trampning aytishicha, Amerika «dushman davlatlardan» yangi valuta yaratmaslik yoki «qudratli AQSh dollari» o‘rnini bosuvchi boshqa valutani qo‘llab-quvvatlamaslik majburiyatini talab qiladi. «Yoki ular 100 foizlik tariflarga duch keladi va AQSh buyuk iqtisodiyotiga mahsulot sotish imkoniyati bilan xayrlashadi», deb yozdi Tramp Truth Social sahifasida.

Uning qo‘shimcha qilishicha, BRICS davlatlarida «xalqaro savdoda yoki boshqa joyda AQSh dollarini almashtirishi uchun hech qanday imkoniyat yo‘q» va bunga harakat qilgan har qanday davlat «bojlarni olqishlab, Amerika bilan xayrlashishi» kerak.

BRICS (Brazil, Russia, India, China, South Africa davlatlari nomining bosh harflaridan tuzilgan qisqartma) 2006 yilda Braziliya, Rossiya, Hindiston va Xitoy tomonidan tashkil etilgan bo‘lib, keyinchalik unga Janubiy Afrika qo‘shilgan. 2024 yil 2 yanvar kuni unga Misr, Eron, BAA va Efiopiya qabul qilindi.

2023 yilda Yohannesburgda bo‘lib o‘tgan BRICS sammitida yagona valuta yaratish masalasi muhokama qilindi. Muhokama ishtirokchilari ushbu valutaning maqsadini savdo va loyihalarni moliyalashtirishni soddalashtirish, shuningdek, xalqaro hisob-kitoblarda dollar va yevroga qaramlikni kamaytirish deb atagan.

Tramp 2024 yil noyabrida ham BRICS yagona valutasini yaratishga urinishlarga boj tariflari bilan tahdid qilgan edi. «Ular boshqa ahmoqni topishi mumkin. BRICS valutasining xalqaro savdoda AQSh dollari o‘rnini egallashiga hech qanday imkoniyat yo‘q», dedi Tramp.