Enter Engineering kompaniyasining rossiyalik xodimi tuman bandlik bo‘limiga qilgan murojaatidan keyin to‘lanmay kelinayotgan ish haqini undirishga muvaffaq bo‘ldi.
Bandlik vazirligining xabar berishicha, 13 yanvar kuni Enter Engineering korxonasi xodimi Ilya Puts 2024 yil iyun oyidan noyabr oyiga qadar to‘lanmay kelinayotgan oylik ish haqini undirishda amaliy yordam so‘rab, Chilonzor tumani Bandlik bo‘limiga murojaat qilgan.
“Murojaat belgilangan tartibda o‘rganib chiqilib, xodimga 57 ming AQSh dollari miqdoridagi oylik ish haqi va hisob-kitob pullari undirib berildi”, – deyiladi xabarda.
Kompaniya saytida ko‘rsatilishicha, Ilya Puts Farg‘ona neftni qayta ishlash zavodining rekonstruksiya va modernizatsiya loyihasiga rahbarlik qilgan.
Eslatib o‘tamiz, Enter Engineering kompaniyasining ko‘plab xodimlari ish haqi vaqtida berilmasligidan tez-tez shikoyat qilib keladi.
2024 yilning noyabr oyida ham ushbu kompaniyaga bevosita va bilvosita aloqador tashkilot xodimlari Kun.uz'ga murojaat qilib, bir necha oydan beri maosh to‘lanmayotganini aytishgandi.
“May oyidan beri oyliklarimiz yo‘q. Faqatgina may, iyun, iyul oyliklaridan ozgina berishdi, 2-3 mlndan. Bu pul nima bo‘ladi oilali odam uchun. Avgust, sentabr, oktyabr oyliklari to‘liq turibdi. Davlatdan kredit olsangiz, 1 kun kechiksa penya tug‘adi. Lekin bizning oylik oylab berilmasa ham hech kimning ishi yo‘q”, – deyilgan edi murojaatda.
Ma’lumot uchun, Enter Engineering 2012 yilda tashkil etilgan bo‘lib, muqaddam “Gazprombank” nazoratida bo‘lgan. Kompaniya neft va gaz, sanoat va fuqarolik obektlarini loyihalash, yetkazib berish, qurish va ishga tushirish bo‘yicha xizmatlar ko‘rsatadi.
