Zelenskiy: AQShning Ukrainaga ko‘rsatayotgan harbiy yordami to‘xtagani yo‘q

AQSh Ukrainaga harbiy yordam ko‘rsatishni davom etmoqda. Bu haqda Volodimir Zelenskiy Davlat departamenti boshqa mamlakatlarga yordam dasturini 90 kunga to‘xtatgani haqidagi xabarlarga bergan izohida ma’lum qildi.

Zelenskiyning so‘zlariga ko‘ra, u «gumanitar dasturlarga 90 kunlik qandaydir cheklovlar borligidan» xabardor.

«Qandaydir cheklovlar borligini bilaman, yaxshilab e’tibor qaratish kerak. Gumanitar dasturlarga 90 kunlik cheklov. Dunyoda AQSh hukumati tomonidan qo‘llab-quvvatlab kelingan ko‘plab institutlar borligidan xabardorman... Men harbiy yordamga e’tirob qaratganman va u to‘xtatilgani yo‘q», — deydi u Moldova prezidenti Mayya Sandu bilan o‘tkazilgan matbuot anjumanida.

Avvalroq AQSh davlat kotibi Marko Rubio mavjud chet el grantlariga ajratiladigan xarajatlarni 90 kunga to‘xtatish bo‘yicha topshiriq bergan edi. Bunday qaror Tramp 20 yanvar kuni prezidentlik lavozimiga kirishganidan keyin qabul qilingan — barcha dasturlar AQSh tashqi siyosatiga mos kelish yoki kelmasligi o‘rganib chiqilgunga qarad to‘xtatiladi. Politico nashri Davlat departamentining qarori Ukrainaga ko‘rsatilayotgan harbiy yordamlarga ham ta’sir ko‘rsatishi mumkinligi haqida yozgandi.

Ukrianadagi loyihalarga mas’ul bo‘lgan Xalqaro taraqqiyot agentligi (USAID) xodimlari barcha ishni to‘xtatish bo‘yicha ko‘rsatma olgan. Reuters manbasining so‘zlariga ko‘ra, maktablar va sog‘liqni saqlash sohasiga oid loyihalarni qo‘llab-quvvatlash muzatilgan.