«Xalqaro ta’lim kuni arafasida men O‘zbekistonning bu yo‘nalishdagi islohotlari samarasini, muvaffaqiyatlarini faxr bilan e’tirof etmoqchiman. Biz ta’lim — farovonlik poydevori ekaniga qat’iy ishonamiz va har bir bola uchun o‘z salohiyatini ro‘yobga chiqarish imkoniyatini ta’minlashga intilamiz», — deb yozadi Saida Mirziyoyeva o‘zining Telegram kanaliga.

Qayd etilishicha, prezident yordamchisi bugun, 23 yanvar kuni xalqaro hamkorlar — UNICEF, UNESCO, UNDP, IHTT, Jahon banki va boshqalar bilan muhim uchrashuv o‘tkazgan. Muloqot davomida ta’lim masalasiga yangi yondashuvlar — innovatsiyalar, zamonaviy metodikalar va jahon tajribasiga asoslangan yechimlar muhokama qilingan.

«Birgalikdagi sa’y-harakatlarimiz natijasida sifatli ta’lim olish imkoniyatidan barcha erkin foydalanishi uchun zarur sharoit yaratishga erishamiz», — deya ta’kidlaydi Mirziyoyeva.

Eslatib o‘tamiz, 15 noyabr kuni Saida Mirziyoyeva talabalar bilan uchrashgan edi. O‘shanda prezident yordamchisi uchrashuv davomida ochiq va samimiy muloqot bo‘lib o‘tganini ta’kidlagandi. Dekabr oxirlarida esa Prezident administratsiyasida O‘zbekistonning navqiron va bilimdon o‘g‘il-qizlari bilan uchrashuv bo‘lib o‘tgandi.