Slovakiya bosh vaziri Robert Fitso 22 yanvar, chorshanba kuni mamlakatda davlat to‘ntarishi sodir bo‘lishi xavfi tufayli Xavfsizlik kengashining 23 yanvarga favqulodda yig‘ilishini chaqirdi. Unga ko‘ra, maxsus xizmatlar Ukraina va Gurjistondagi «rangli inqiloblar»ga o‘xshash «xorijiy ekspertlar» ishtirokidagi davlat to‘ntarishi xavfi haqida ogohlantirgan. «Slovakiyaning qonuniy hokimiyatini ko‘cha namoyishlari va ma’muriy binolarni tortib olish orqali ag‘darish rejalari bor», — dedi Fitso.

«Tayyorlanayotgan model juda oddiy va ko‘plab mamlakatlarda sinovdan o‘tgan. Tasdiqlashim mumkinki, Slovakiyada Gurjistondagi voqealarda ishtirok etgan va Ukrainadagi Maydanda faol qatnashgan bir guruh ekspertlar bor. Ular turli manbalardan moliyalashtiriladi», dedi Slovakiya bosh vaziri matbuot anjumanida.

Muxolifat hukumatga ishonchsizlik votumini talab qilmoqda

22 yanvar kuni Slovakiyaning uchta muxolif partiyasi – «Progressiv Slovakiya», «Ozodlik va birdamlik» va «Xristian-demokratik harakat» Robert Fitso hukumatiga ishonchsizlik votumi o‘tkazish bo‘yicha taklifni parlamentga qayta taqdim etdi. Ovoz berish yetti kun ichida o‘tkazilishi mumkin. Ishonchsizlik votumi uchun 150 deputatdan kamida 76 nafarining roziligi talab qilinadi.

Muxolifat Fitsoning ochiq ovoz berishni emas, balki yashirin ovoz berish qaroriga norozilik sifatida bir kun avval parlamentdan xuddi shunday taklifni qaytarib oldi. Ishonchsizlik votumiga hukumatning Slovakiya yakkalanib qolishiga olib kelayotgan tashqi siyosati, shuningdek, Fitsoning Rossiya prezidenti Vladimir Putin bilan aloqalari va Slovakiyaning Yevropa Ittifoqi va NATOdan uzoqlashishi sabab bo‘ldi.