Jo Baydenni yoshi uchun tanqid qilib, uning dovdirashi va yanglish gaplari uchun hazil qilish imkoniyatini qo‘ldan chiqarmay kelgan Donald Tramp Oq uyga AQShning eng keksa prezidenti sifatida qaytdi.

20 yanvar kuni o‘tkazilgan inauguratsiya vaqtida Tramp 78 yosh va yetti oylik bo‘lgan — bu 2021 yilda mamlakat prezidenti lavozimiga kirishgan Baydenning o‘sha vaqtdagi yoshidan qariyb olti oyga katta demak. Respublikachining o‘zi kognitiv testlarni yaxshi yechishi va ideal jismoniy holatda ekanini ta’kidlab keladi.

«RBK» nashri hisob-kitoblariga ko‘ra, amerikalik yetakchilarning o‘rta yoshi 56 yilni tashkil etadi. Pew Research Center so‘rovlari natijasida keltirilishicha, Amerika aholisining 49 foizi prezidentlik uchun eng yaxshi yoshni 50 deb hisoblaydi, respondentlarning faqat 3 foizi davlat rahbari uchun optimal yosh — 70 va undan yuqori yoshlar ekanini bildirgan.

Dunyodagi vaziyat

Donald Tramp o‘z hamkasblari fonida yaqqol ajralib turmaydi. Chunki «Katta yigirmatalik» davlatlari rahbarlari asosan 70-80 yosh oralig‘ida. Ular orasida faqat ikkita davlat yetakchisi AQSh rahbaridan katta — bu Braziliya prezidenti Lula da Silva (79 yosh) va Saudiya Arabistoni podshohi Salmon ibn Abdulaziz Ol Saud (89 yosh).