Vazirlar Mahkamasining «Muomalaga chiqarilayotgan qishloq va o‘rmon xo‘jaligi transport vositalari va mashinalarining xavfsizligi to‘g‘risidagi texnik reglamentni tasdiqlash haqida»gi qarori qabul qilindi. 

Texnik reglament:

• muomalaga chiqarilayotgan qishloq va o‘rmon xo‘jaligi transport vositalari va mashinalariga (texnika vositalari) qo‘yiladigan xavfsizlik talablari;
• texnika vositalarini identifikatsiya qilish qoidalari;
• texnika vositalarini muomalaga chiqarish qoidalari hamda muvofiqlik belgisi bilan tamg‘alash;
• texnik reglament talablariga rioya etilishi ustidan davlat nazoratini o‘rnatish tartibini belgilaydi;

Texnika vositalarini loyihalash, ishlab chiqarish va montaj qilish jarayonida atrof-muhitga va odamlarga xavfli ta’sir ko‘rsatilishini istisno qilish kerak.

Ishlab chiqaruvchilar texnika vositalari, tizimlari, komponentlari va alohida texnik qismlarining texnik reglament talablariga muvofiqligi, shuningdek, quyidagilarni ta’minlashi kerak:

• texnika vositasining konstruktiv butunligi;
• texnika vositasini boshqarishni yengillashtiradigan tizimlar, xususan, boshqaruv ruli va tormozlash tizimi, shuningdek, takomillashtirilgan tormoz va barqarorlik nazoratining elektron tizimlari;
• haydovchiga ko‘ruvchanlik darajasi, texnik holat hamda atrof muhit to‘g‘risida axborot berish tizimlari, shu jumladan, oyna, ko‘zgu va ogohlantirish tizimlari;
• texnika vositasining yoritish tizimlari;
• texnika vositasining unda ishlovchilar xavfsizligini ta’minlaydigan ichki jihozlanishi;
• tovushli ishora (signal) qurilmalari;
• isitish va sovitish tizimlari;
• ruxsatsiz foydalanishning oldini olish uchun qurilmalar;
• texnika vositasini identifikatsiyalash tizimlari;
• vazni va gabaritlarining texnik tavsiflarga mosligi;
• yuk ortish-tushirish platformalari;
• orqaga yurish uzatmasi va boshqalar.