Қишлоқ транспорт воситалари хавфсизлигининг техник регламенти тасдиқланди

Фото: Kun.uz

Вазирлар Маҳкамасининг «Муомалага чиқарилаётган қишлоқ ва ўрмон хўжалиги транспорт воситалари ва машиналарининг хавфсизлиги тўғрисидаги техник регламентни тасдиқлаш ҳақида»ги қарори қабул қилинди.

Техник регламент:

муомалага чиқарилаётган қишлоқ ва ўрмон хўжалиги транспорт воситалари ва машиналарига (техника воситалари) қўйиладиган хавфсизлик талаблари;
техника воситаларини идентификация қилиш қоидалари;
техника воситаларини муомалага чиқариш қоидалари ҳамда мувофиқлик белгиси билан тамғалаш;
техник регламент талабларига риоя этилиши устидан давлат назоратини ўрнатиш тартибини белгилайди;

Техника воситаларини лойиҳалаш, ишлаб чиқариш ва монтаж қилиш жараёнида атроф-муҳитга ва одамларга хавфли таъсир кўрсатилишини истисно қилиш керак.

Ишлаб чиқарувчилар техника воситалари, тизимлари, компонентлари ва алоҳида техник қисмларининг техник регламент талабларига мувофиқлиги, шунингдек, қуйидагиларни таъминлаши керак:

техника воситасининг конструктив бутунлиги;
техника воситасини бошқаришни енгиллаштирадиган тизимлар, хусусан, бошқарув рули ва тормозлаш тизими, шунингдек, такомиллаштирилган тормоз ва барқарорлик назоратининг электрон тизимлари;
ҳайдовчига кўрувчанлик даражаси, техник ҳолат ҳамда атроф муҳит тўғрисида ахборот бериш тизимлари, шу жумладан, ойна, кўзгу ва огоҳлантириш тизимлари;
техника воситасининг ёритиш тизимлари;
техника воситасининг унда ишловчилар хавфсизлигини таъминлайдиган ички жиҳозланиши;
товушли ишора (сигнал) қурилмалари;
иситиш ва совитиш тизимлари;
рухсатсиз фойдаланишнинг олдини олиш учун қурилмалар;
техника воситасини идентификациялаш тизимлари;
вазни ва габаритларининг техник тавсифларга мослиги;
юк ортиш-тушириш платформалари;
орқага юриш узатмаси ва бошқалар.