MrBeast TikTok’ni “qutqarish uchun” uni sotib olmoqchiligini ma’lum qildi

Yirik loyihalar va xayriya tadbirlari bilan tanilgan amerikalik mashhur bloger MrBeast TikTok’ni sotib olishi mumkin. Shu tariqa bloger TikTok’ni AQShda bloklanishdan “qutqarmoqchi”.

“Mayli, TikTok’ni bloklamasliklari uchun uni sotib olaman”, — deya hazil aralash tvit yozgan MrBeast X ijtimoiy tarmog‘idagi sahifasida.

Blogerga ko‘ra, milliarderlar hamkorlik taklifi bilan allaqachon unga murojaat qilishni boshlagan.

“Taqdir hazilini qarang, men buni Twitter’da yozganimdan keyin menga shunchalik ko‘p milliarderlar murojaat qildiki, keling, buni amalga oshira olamizmi yo‘qmi, ko‘ramiz”, — deya yana bir post qoldirdi Mr Beast.

TikTok’ni sotish nima uchun kerak?

2024 yil aprel oyida AQShda TikTok’ni taqiqlashga olib kelishi mumkin bo‘lgan qonun loyihasi qabul qilingandi. Senat to‘rtta qonundan iborat to‘plamni qo‘llab-quvvatladi. Ulardan biri TikTok’ka egalik qiluvchi Xitoy kompaniyasi ByteDance’dan ilovani xorijiy kompaniyaga sotishni talab qiladi. Bu jarayon uchun to‘qqiz oy muddat belgilandi.

Aks holda, Amerikada ilovadan foydalanish imkoniyati yo‘qoladi. Belgilangan muddat 2025 yil 19 yanvarda tugaydi. Bu sana platformaning kelajagi uchun hal qiluvchi ahamiyatga ega.

Avvalroq Bloomberg Xitoy hukumati TikTok’ning AQShdagi bo‘limini boshqarishni tadbirkor Ilon Maskka topshirish imkoniyatini ko‘rib chiqayotgani haqida xabar bergandi. TikTok vakili esa Maskning ijtimoiy tarmoqni sotib olishi ehtimolini qat’iyan rad etdi.

TikTok qancha turadi?

The Wall Street Journal xabariga ko‘ra, TikTok egasi ByteDance 2024 yilning to‘rtinchi choragida o‘zini taxminan 300 milliard AQSh dollariga baholagan. Shu tariqa u dunyodagi eng qimmat xususiy kompaniyalardan biri bo‘lib qolmoqda.