Germaniya Polsha, Fransiya, Italiya va Buyuk Britaniyadan iborat "beshlik guruhi" bo‘yicha hamkorlari bilan AQShdagi prezidentlik saylovlaridan keyin Ukrainaga harbiy yordamni qanday oshirishni muhokama qilmoqda. Bu haqda 14 yanvar, seshanba kuni Kiyevda Ukraina rahbariyati bilan o‘tkazilgan qo‘shma matbuot anjumanida Germaniya mudofaa vaziri Boris Pistorius ma’lum qildi.
«Beshlik guruhi»ni yaratish tashabbusi o‘tgan yilning noyabrida, AQShdagi prezidentlik saylovlaridan so‘ng boshlangan edi. Men rojdestvo arafasida hamkasblarimni Berlinga taklif qildim, - dedi Pistorius DW muxbirining savoliga javoban. - Vashingtondagi saylov natijalaridan qanday xulosalar chiqarishimiz kerakligi haqidagi birinchi uchrashuvimiz, avvalambor, bu Yevropa xavfsizligini ta’minlash uchun kelajakdagi mudofaa xarajatlari nuqtayi nazaridan muhim edi. Urushdan keyingi vaziyatni hisobga olgan holda ittifoqchilarimiz imkoniyatlarini, Ukrainani qo‘llab-quvvatlashimizni qanday kuchaytirishimiz muhokama qilindi».
«Bu yo‘lda biz muhokama qilmoqdamiz va dastlabki qarorlarni qabul qilmoqdamiz, bu ish Parijda bo‘lib o‘tadigan navbatdagi yig‘ilish ("beshlik guruhi" mudofaa vazirlari) arafasida davom etmoqda», — davom etdi Boris Pistorius. Muhokamaning asosiy yo‘nalishlari qatorida u Ukrainadagi mudofaa qo‘shma korxonalari imkoniyatlarini kengaytirish, Yevropa davlatlari va Ukraina o‘rtasidagi hamkorlik darajasini oshirish, bir-biridan ilg‘or tajribalarni o‘zlashtirishni qayd etdi. Maqsad «Ukrainaga kerakli yordamni berish uchun bundan keyin nima qilish kerakligini aniqlash», dedi Germaniya mudofaa vaziri.
Zelenskiy: Bugun Ukrainani himoya qilishni istamaganlar ertaga o‘zini qanday himoya qilish haqida o‘ylaydi
Xuddi shu matbuot anjumani chog‘ida Ukraina prezidenti Volodimir Zelenskiy DW'ning Germaniyada bo‘lib o‘tadigan navbatdan tashqari parlament saylovlari oldidan «Germaniya uchun muqobil» o‘ng populistik partiyasi 20 foizdan ko‘proq ovoz bilan ikkinchi o‘rinda turganidan xavotirdami yoki yo‘qmi, degan savoliga shunday javob qaytardi: «Bilasizmi, ritorikaga qaramay... Yevropada ham, AQShda ham ko‘pchilik Ukraina faqatgina o‘zini himoya qilmayapti, degan fikrda».
«Biz (umumiy) qadriyatlarni himoya qilmoqdamiz, Yevropa, demokratiya va erkinlikni himoya qilmoqdamiz, - dedi Zelenskiy. - Bizning harbiylarimiz o‘z o‘rnidan qat’i nazar, hammani himoya qilmoqda. Menimcha, bugun Ukrainani himoya qilishni istamagan har bir kishi ertaga o‘zini qanday himoya qilish haqida o‘ylashi kerak».
