2024 yilda Rossiyaning 47 ta hududida migrantlarni ishga joylashtirishga taqiq va cheklovlar joriy etildi, deb xabar berdi «Vyorstka».

Eng ko‘p cheklov Krasnodar o‘lkasida joriy etilgan — chet elliklarga 99 ta sohada ishlash taqiqlangan. Ikkinchi o‘rinda Tver oblasti (82), eng kam cheklovlar Voronej oblastida - 10 ta.

Chet elliklar uchun eng ko‘p taqiq taksi va jamoat transporti sohalarida - 47 ta hududda joriy etilgan. Savdo sohasida 39 ta hududda, uy-joy kommunal xo‘jaligida 14 tada va kuriyerlik sohasida 12 ta hududda cheklov amal qiladi.

19 ta hududda tibbiyot sohasida: shifoxonalar, dorixonalar va dori-darmonlar ishlab chiqarishda taqiqlar joriy etildi. Ta’lim sohasida – 27 ta, harbiy-sanoat kompleksi zavodlarida faqat 7 ta hududda taqiq joriy qilingan. Qurilishda - faqat ikkita mintaqada: Krasnodar o‘lkasi va Yamalo-Nenets avtonom okrugida.

Muayyan hududlarda ishga joylashish bo‘yicha cheklovlarda mintaqalar ba’zi istisnolarni kiritgan - asosan malakasiz ishchilar va farroshlar uchun. Ba’zan bu istisnolar juda keng bo‘lib, cheklovlar ma’nosiz bo‘lib qoladi.

40 ga yaqin mintaqalar bandlik bo‘yicha cheklovlarni joriy qilinmadi, jumladan, yirik iqtisodiyotga ega Moskva, Sankt-Peterburg, Tatariston, Boshqirdiston, Sverdlovsk oblasti.

2024 yil mart oyida Moskvaning «Krokus Siti Xoll» konsert zalidagi teraktdan keyin Rossiya rasmiylari migrantlarga qarshi keng ko‘lamli kampaniya boshladi. Davlat Dumasi deputatlari yangi qonunlar bilan, mintaqa rahbarlari yangi taqiqlar bilan migrantlarning mehnatini cheklay boshladi. Oqibatda, 2024 yilda Rossiyadan chiqib ketayotgan migrantlar oqimi ko‘paygani qayd etildi.