Jizzax viloyati Zomin tumanida ilonni tiriklay yegan shaxsga jarima qo‘llanildi. Bu haqda Jizzax viloyat Ekologiya boshqarmasi xabar berdi.

Ma’lum qilinishicha, ijtimoiy tarmoqlarda fuqaro ko‘lvor ilonni tiriklay yegani aks etgan video lavha tarqalgan. Holat yuzasidan Zomin tuman Ekologiya inspeksiyasi va IIB xodimlari o‘rganish olib borgan.

O‘rganish davomida bu ishni fuqaro Q.H. sodir etgani aniqlangan. Fuqaro bu harakati bilan «Hayvonot dunyosini muhofaza qilish va undan foydalanish to‘g‘risida»gi qonunining 4, 30, 51, 53-moddalari talablarini buzgan. 

Davlat inspektorlari tomonidan fuqaroga nisbatan Ma’muriy javobgarlik to‘g‘risidagi kodeksning 90-modda 1-qismi (Ov qilish va baliq ovlash qoidalarini, shuningdek, hayvonot dunyosidan foydalanishning boshqa turlarini amalga oshirish qoidalarini buzish, jinoyat alomatlari mavjud bo‘lmasa) bilan BHMning 20 baravari (7,5 mln so‘m) miqdorida jarima qo‘llangan.

Shuningdek, 1 mln 125 ming so‘m miqdorida tabiatga yetkazilgan zarar hisoblangan.