Yevropa kosmik agentligining (ECA) BepiColombo zondi Merkuriy yonidan atigi 295 kilometr uzoqlikda uchib o‘tdi va ajoyib suratlarni oldi.

Parvoz paytida olingan ilmiy ma’lumotlar Merkuriy tarixini tushunish uchun yangi imkoniyatlar ochadi. Olimlarning taxminiga ko‘ra, sayyoraning soya hududlarida uning o‘tmishi va ehtimol, kelajagi haqida asosiy ma’lumotlarni saqlaydigan muzliklar bo‘lishi mumkin. «BepiColombo jamoasi ushbu parvoz ma’lumotlarini anglash uchun ko‘p ishlaydi», dedi ECA loyihasi olimi Geraynt Jons.

Endi missiya navbatdagi, 2027 yilga mo‘ljallangan ma’lumotlarni yig‘ish jarayoniga tayyorgarlik ko‘radi. «Asosiy missiyaga ikki yil qoldi, lekin biz allaqachon Merkuriy haqida bebaho tushunchalarga ega bo‘ldik», deb qo‘shimcha qildi Jons.

Merkuriy — noyob sayyora, u Oydan biroz kattaroq va Quyoshdan o‘rtacha 58 million kilometr uzoqlikda joylashgan. Uning yuzasida harorat -180 dan +430°S gacha o‘zgarib turadi. Atmosfera deyarli yo‘q, bu sayyorani quyosh radiatsiyasi va meteorit ta’siriga zaif qiladi.

2018 yil oktyabr oyida ishga tushirilgan BepiColombo zondi Merkuriyning magnitlanishi, gaz ekzosferasi va sirt xususiyatlarini o‘rganadi. Yangi suratlarda sayyoradagi eng katta vulqon otilishi guvohi bo‘lgan Nathair Fakula kraterini, shuningdek, nisbatan navqiron, 300 million yoshli Fonteyn krateri kabi ajoyib tafsilotlarni ko‘rish mumkin.

2026 yilda zond Merkuriyga qaytib, orbitaga ikkita tadqiqot apparatini olib chiqadi. Ushbu qurilmalar turli balandliklarda ma’lumotlarni to‘playdi, bu esa sayyora haqida yanada to‘liqroq tasavvur hosil qilish imkonini beradi.