Rossiyalik siyosiy mahbus, sobiq munitsipal deputat Aleksey Gorinov Yevropa Ittifoqi tomonidan inson huquqlari uchun kurash, fuqarolik pozitsiyasi va muhtojlarni qo‘llab-quvvatlagani uchun beriladigan Pavel Adamovich mukofotining qisqa ro‘yxatiga kiritildi. Tegishli xabar Yevropa mintaqalar qo‘mitasi matbuot xizmati tomonidan e’lon qilindi.
Shuningdek, mukofotga Kiyev meri Vitaliy Klichko, Lviv meri Andrey Sadoviy, Fransiyadagi Camp des Milles asoschisi Alen Shuraki, Falastin va Isroil hamjamiyatlari rahbarlari Bassam Aramin va Rami Elxanan, Ispaniyadan «Kamira» ayollar uyushmalari milliy federatsiyasi da’vogarlik qilyapti.
G‘oliblar 13 yanvar kuni 2019 yilda o‘ldirilgan Pavel Adamovich mer bo‘lgan Gdanskda e’lon qilinadi. Taqdirlash marosimi 20 fevral kuni Bryusselda Yevropa mintaqalar qo‘mitasining yalpi majlisi doirasida bo‘lib o‘tadi.
Aleksey Gorinovning ta’qib qilinishi
Aleksey Gorinov 2022 yilning 26 aprelidan beri hibsda. 2022 yil iyul oyida u «siyosiy nafrat asosida o‘z mansab mavqeyidan foydalangan holda bir guruh shaxslar tomonidan Rossiya Federatsiyasi Qurolli kuchlari to‘g‘risida bila turib yolg‘on ma’lumotni ommaviy tarqatganlik» uchun yetti yilga umumiy rejimli koloniyaga hukm qilindi. Deputatlar kengashi yig‘ilishida siyosatchi boshqa narsalar qatori «Ukrainada davom etayotgan harbiy tajovuz qurbonlari uchun» bir daqiqa sukut e’lon qilishni taklif etgan.
Shu bilan birga, Gorinov Ukrainadagi urush tufayli Krasnoselskiy rayonida ko‘ngilochar tadbirlarni tashkil etishga qarshi chiqdi. «Qo‘shni suveren davlat hududida harbiy harakatlar olib borilayotganda, bizning mamlakatimizning tajovuzkorligi amalga oshirilayotganda qanday dam olish va o‘yin-kulgi haqida gapirish mumkin», dedi deputat. Keyinchalik unga qarshi ikkinchi jinoiy ish ochildi. 29 noyabr kuni Gorinov terrorizm uchun qo‘shimcha uch yil qamoq jazosiga hukm qilindi.
