30 dekabr, dushanba kuni chop etilgan Aleksey Navalniyning «Patriot» xotiralar kitobining elektron versiyasini Rossiyadan foydalanuvchilar bepul yuklab olishlari mumkin. Bu haqda rossiyalik muxolifatchining bevasi Yuliya Navalnaya ma’lum qildi va buning uchun ro‘yxatdan o‘tish yoki ma’lumot qoldirishning hojati yo‘qligini ta’kidladi: «Shunchaki saytga kiring, maxsus tugmani bosing — shunda sizda kitob bo‘ladi».
«Men bu kitobni iloji boricha ko‘proq odamlar o‘qishini xohlayman», — deb yozdi u ijtimoiy tarmoqlarda. Navalnaya postga qo‘shilgan videomurojaatida tushuntirganidek, «o‘nlab mamlakatlarda millionlab odamlar shunchaki do‘konga borib sotib olish imkoniga ega ekani, lekin Rossiyada bu hali mumkin emasligi yaxshi emas».
Boshqa mamlakatlar aholisi Navalniyning elektron formatdagi xotiralarini 10 yevroga sotib olishlari mumkin.
Bir vaqtning o‘zida 26 tilda nashr etilgan Aleksey Navalniyning «Patriot» avtobiografiyasi 22 oktyabr kuni sotuvga chiqdi. Germaniyada kitob Fischer tomonidan nashr etilgan. Nashriyot veb-saytida ta’kidlanganidek, bu - «o‘z e’tiqodlari uchun eng yuqori narxni to‘lagan qo‘rqmas muxolifat liderining kuchli va ta’sirli avtobiografiyasi».
RFda kardiojarroh FBKga donat yuborgani uchun to‘rt yilga qamaldi
Moskvaning Perovskiy sudi kardiojarroh Ivan Tishchenkoni 24 dekabr kuni «ekstremistik faoliyatni» moliyalashtirish (Rossiya Federatsiyasi Jinoyat kodeksining 282.3-moddasi 1-qismi) moddasi bo‘yicha to‘rt yilga umumiy rejimdagi koloniyaga hukm qildi. Bu haqda «Moskva shahrining umumiy yurisdiksiya sudlari» Telegram-kanalida aytilgan. SOTAvision nashrining aniqlik kiritishicha, bunday hukmga Tishchenkoning marhum rossiyalik muxolifatchi Aleksey Navalniy sheriklarining Korrupsiyaga qarshi kurash fondi (FBK)ga mablag‘ xayriya qilgani sabab bo‘lgan.
Ivan Tishchenkoning advokati Natalya Tixonova RBK agentligiga bergan izohida himoyachi hukmdan hayratda qolganini va ustidan shikoyat qilishni rejalashtirayotganini aytdi. «Bu minglab insonlar hayotini saqlab qolgan va, albatta, Rossiyaning konstitutsiyaviy tuzumiga xavf tug‘dirish niyatida bo‘lmagan shaxs uchun juda og‘ir jazo, u FBK ekstremistik tashkilot deb tan olinishidan oldin obuna bo‘lgan va obunani bekor qilishni unutgan», — dedi u.
SOTAvision shuningdek, jarroh ozodlikda bo‘lganida jurnalistlarga FBK Rossiyada «ekstremistik» deb tan olinmasidan oldin pul xayriya qilganini, ammo obunani vaqtida bekor qilishni unutganini ta’kidlagan. Tishchenko bu ishda aybini tan oldi. Uning ishi bor-yo‘g‘i bir hafta, 2024 yil 17 dekabrdan boshlab ko‘rib chiqildi.
