Farg‘ona viloyati IIB YHXB Qo‘qon shahrida yo‘l-patrul xizmatiga tegishli mashina ishtirokida yuz bergan yo‘l-transport hodisasi yuzasidan ma’lumot berdi.

Qayd etilishicha, internet ijtimoiy tarmoqlarida YPXga tegishli avtomobil yo‘l-transport hodisasiga uchragani haqida tarqalgan videoxabar Farg‘ona viloyati IIB tomonidan o‘rganib chiqilgan.

Ma’lum bo‘lishicha, 30 dekabr kuni Qo‘qon shahar Istiqlol mahallasidan o‘tgan Qo‘qon — Yaypan — Isfara avtomobil yo‘lining 1-kilometrida fuqaro X.R. o‘z boshqaruvidagi Onix rusumli avtomobilda chorrahaga yo‘l bermasdan kirib kelgan va natijada viloyat IIB YHXB xodimi Sh.M. boshqaruvidagi Tracker rusumli avtomobil bilan to‘qnashuv sodir etgan.

Natijada, Onix rusumli avtomobil yo‘lovchisi hamda Tracker avtomobili haydovchisi Sh.M. «yumshoq to‘qimalarini lat yeyishi» tashxisi bilan shahar shifoxonaga murojaat qilgan.

Holat yuzasidan viloyat IIB tomonidan o‘rganish ishlari davom etmoqda.

Eslatib o‘tamiz, joriy yilning aprel oyida Qashqadaryo viloyati YHXB komandiri o‘rinbosari YTH sodir etgani, mayda esa Toshkentda BYD haydovchisi YPX inspektorini urib yuborgani to‘g‘risida xabar berilgandi.