YeI sanksiyalaridagi bo‘shliq tufayli mamlakat prezidenti Vladimir Putinga yaqin hisoblangan Rossiya Federatsiyasi milliarderlari YeI bilan savdodan pul ishlashda davom etmoqda. 22 dekabr, yakshanba kuni chop etilgan The Insider internet-nashrining surishtiruvi mualliflari shunday xulosaga keldi.
«Aksiyadorlari Vladimir Putinga shaxsan yaqin hisoblangan milliarderlar bo‘lgan kompaniyalar o‘z mahsulotlarini G‘arbga hech narsa bo‘lmagandek eksport qilishda davom etmoqda, - deb yozadi nashr. - Sanksiyalarga duchor bo‘lgan tadbirkorlarda aksiyalarning 50 foizdan kam bo‘lishi natijasida Yevropa bilan savdodan milliardlab dollar foyda olinyapti».
Oleg Deripaska qanday qilib sanksiyalarni chetlab o‘tdi
Jurnalistlarning so‘zlariga ko‘ra, Deripaska Yevropa Ittifoqi unga qarshi sanksiyalar kiritganidan so‘ng En+ va shunga mos ravishda «Rusal»dagi ulushini 50 foizdan pastga tushirgan. Bu avtomatik ravishda korxonalarning o‘zini sanksiyalardan olib tashladi. «Bugun Deripaska En+'ning 35 foizini nazorat qiladi. En+, o‘z navbatida, yirik alyuminiy ishlab chiqaruvchi «Rusal»ning deyarli 57 foiz aksiyalariga egalik qiladi», deb tushuntiriladi surishtiruvda.
Mualliflarning aniqlashicha, 2024 yilning birinchi yarmida «Rusal» Yevropa mamlakatlarida 1,3 milliard dollar ishlab topgan. Ularning ko‘rsatishicha, kompaniya Shvetsiyada (Kubikenborg Aluminium AB), Irlandiyada (Aughinish Alumina), Germaniyada (Aluminium Rheinfelden) va Italiyada (Eurallumina) ishlab chiqarishga ega.
Urush paytida, 2022 yildan 2024 yilgacha Deripaskaning boyligi bir yarim baravardan ko‘proqqa oshdi, deb yozadi The Insider. Forbes ma’lumotlariga ko‘ra, uning umumiy aktivlari hozirda 2,8 milliard dollarga baholangan.
Sanksiyalarni chetlab o‘tish uchun kompaniyadagi ulush kamaytirilishi
Putinga yaqin bo‘lgan, foyda oluvchi kompaniyalardagi ulushini kamaytirish yoki aktivlarining bir qismini qarindoshlariga o‘tkazish yo‘li bilan G‘arb sanksiyalarini chetlab o‘tishga muvaffaq bo‘lgan boshqa rossiyalik tadbirkorlar orasida, The Insider yozishicha, "Fosgaro" aksiyadori Andrey Gurev, Sankt-Peterburg tog‘-kon universiteti rektori Vladimir Litvinenko, "Yevroxim" kompaniyasi aksiyadori Andrey Melnichenko, "Yevraz" va "Nornikel" aksiyadori Roman Abramovich, "Novatek" va "Sibur" aksiyadori Gennadiy Timchenko bo‘lishi mumkin.
