100 dan ortiq BMW avtomobillari Rossiyaga eksport qilindi, bu Yevropa Ittifoqining Rossiya Federatsiyasiga qarshi sanksiyalari tufayli kiritilgan qattiq embargoga qaramay yuz berdi. Bu haqda 22 dekabr, yakshanba kuni BMW Group matbuot xizmatiga tayanib, dpa agentligi xabar berdi.
Myunxen avtomobil ishlab chiqaruvchisi ichki tekshiruvlar davomida qoidabuzarliklarni aniqladi, deya ma’lum qildi kompaniya. Avtomobillarning keyingi savdosi to‘xtatildi, deya qo‘shimcha qilindi.
«Bundan tashqari, BMW Group asosiy javobgarlikka ega bo‘lgan xodimlarni ishdan bo‘shatishga qaror qildi», — deyiladi bayonotda.
BMW Group «kulrang» import haqida e’lon qildi
BMW cheklovchi choralarga rioya qiladigan turli sohalardagi kompaniyalar ko‘pincha o‘z mahsulotlari Rossiyaga «kulrang» import orqali kirishiga duch kelishini ta’kidladi. BMW Group buning oldini olishga harakat qilmoqda, deya qo‘shimcha qildi korporatsiya.
Business Insider birinchilardan bo‘lib ehtimoliy qonunbuzarliklar haqida xabar berdi. Unga ko‘ra, rossiyalik mijozlarga BMW'ning Hannoverdagi filialidan 100 dan ortiq avtomobil yetkazib berilgan. Konsernda ichki tekshiruv boshlangan.
OAV: Rossiya Yevropa Ittifoqi va AQShdan snayper miltiqlarini olyapti
Rossiya Yevropa Ittifoqi va AQShdan sanksiyalarni chetlab o‘tib, sobiq SSSR davlatlari orqali snayper miltiqlari va o‘q-dorilarini olishda davom etmoqda. Bu xulosa 11 dekabr kuni The Insider (Rossiya), Investigace (Chexiya), IrpiMedia (Italiya) va "Vlast" (Qozog‘iston) tomonidan chop etilgan qo‘shma surishtiruvda keltirilgan.
Jurnalistlar egallab olingan Qrimdagi rossiyalik snayperlar arsenalidan Desert Tech SRS (AQSh), Accuracy International AXSR (Buyuk Britaniya) va Steyr Mannlicher SSG (Avstriya) kabi miltiqlarni topdi. Snayperlar musobaqalarining ochiq ma’lumotlariga ko‘ra, ularning aksariyati G‘arb miltiqlari va patronlarini afzal ko‘radi. Mahalliy analoglar o‘q otish masofasi past va ularni ishlab chiqarish armiya ehtiyojlarini qondirolmaydi, deb yozadi The Insider.
Surishtiruv davomida ma’lum bo‘lishicha, G‘arb qurollari Rossiya Federatsiyasiga possovet davlatlari orqali kirib keladi. Xalqaro statistik ma’lumotlarga ko‘ra, Yevropa Ittifoqi, Turkiya va AQShdan Armaniston, Gurjiston, Qozog‘iston va Qirg‘izistonga miltiqlar eksporti 2020 yildan 2023 yilgacha 2,7 barobarga oshib, 53 211 donani tashkil qildi.
Misol uchun, Italiyadan Armanistonga miltiq eksporti 2019 yildagi 68 ta quroldan 2023 yilda 1862 tagacha oshgan. Qirg‘iziston 2020 va 2021 yillarda Italiyadan umuman qurol sotib olmagan. 2022 yilda yetkazib berish 882 tani, 2023 yilda esa 4434 donani tashkil etdi.
