Uchrashuvda, shuningdek, Hilton Pharma, Fatima Group, Sheikhpura textile mills kompaniyalari va Askari bank banki rahbarlari ham ishtirok etishdi.

Muzokaralar chog‘ida mamlakatning to‘qimachilik, farmatsevtika, ko‘chmas mulk, bank-moliya va qurilish sohalariga Pokiston investorlarini jalb qilish, qo‘shma loyihalarni amalga oshirish masalalari ko‘rib chiqildi.

Gohar Ejaz O‘zbekiston prezidentining mintaqaviy bog‘liqlikni qayta tiklash, iqtisodiy integratsiya jarayonlarini jadallashtirish, umumiy farovonlikka erishish borasidagi strategik tashabbuslarining to‘liq tarafdori ekanligini e’tirof etdi.

Davlatlar o‘rtasida o‘zaro savdo hajmlarini yanada oshirishga qaratilgan choralar, jumladan, transport-logistika va bank sohalarida qo‘shma loyihalarni amalga oshirish bo‘yicha takliflar xususida fikr almashildi.

Pokistonlik tadbirkor ikki tomonlama investitsion hamkorlikni yangi bosqichga olib chiqish uchun o‘zaro manfaatli sohalarda faoliyat yurituvchi yirik biznes vakillari orasida bevosita muloqot platformasini yaratishni taklif etdi. Shu maqsadda kelgusi yilning birinchi choragida 10 nafar yirik ishbilarmonlardan iborat delegatsiyasining O‘zbekistonga safari uyushtirilishi bildirildi.

Bundan tashqari, 2025 yilda O‘zbekistonda "Umumpokiston to‘qimachilik ishlab chiqaruvchilar uyushmasi" (APTMA) filiali ochilishi rejalashtirilayotgani ma’lum qilindi.