Eron 60 foizgacha boyitilgan uran ishlab chiqarishni keskin oshirmoqda, bu yadroviy qurol ishlab chiqarish uchun yaroqli 90 foizgacha boyitishdan oldingi yakuniy texnik qadamdir. Eronning hozirgi zaxiralari keyingi boyitish bilan to‘rtta yadro kallagi ishlab chiqarish uchun yetarli bo‘ladi. Bu haqda Atom energiyasi bo‘yicha xalqaro agentlik (AEXA) rahbari Rafael Grossi aytib o‘tdi.

Noyabr oyidagi AEXA hisobotida aytilishicha, 26 oktyabr holatiga ko‘ra Eron 60 foizga boyitilgan 182,3 kg uranga ega, bu avgust oyidagi hisobotga nisbatan 17,6 kg ko‘p. Eron uran zaxirasini kamaytirish va’dasiga qaramay, uni oshirishda davom etmoqda va umumiy zaxirasi 6,5 tonnadan ortgan.

21 noyabr kuni AEXA Boshqaruvchilar kengashi Eronni agentlik bilan faolroq va shaffof hamkorlik qilishga chaqiruvchi rezolyutsiya qabul qildi.

Eron parlamenti spikeri Muhammad Qolibof buni «adolatsiz va konsensussiz» deb atadi va G‘arb davlatlarining Eronning «tinch» yadroviy dasturiga «noreal, siyosiylashgan va buzg‘unchi yondashuvini» aks ettirishini ta’kidladi. Keyin Eron bir qator yangi sentrifugalarni faollashtirish jarayonini boshladi. Qolibof so‘zlariga ko‘ra, bu qadam Eronning xalqaro tuzilmalar tomonidan «siyosiy manipulyatsiyaga» qarshi turish qat’iyatini ko‘rsatadi, shu bilan birga mamlakat «faqat tinch texnologiyalardan» foydalanadi.