Rossiya prezidenti Vladimir Putin 2025 yilgi federal budjet va 2026-2027 yillar rejalashtirish davri to‘g‘risidagi qonunni imzoladi, hujjat huquqiy axborot portalida e’lon qilindi. Davlat Dumasi federal budjet to‘g‘risidagi qonunni 21 noyabrda qabul qildi, Federatsiya Kengashi uni 27 noyabrda tasdiqlagan edi.
2025 yilda federal budjet daromadlari 40,296 trillion rubl, 2026 yilda - 41,84 trillion rubl, 2027 yilda - 43,15 trillion rubl bo‘lishi kutilmoqda. Xarajatlar mos ravishda 41,47 trillion rubl, 44,02 trillion va 45,92 trillion rublni tashkil etishi kutilmoqda. Shunday qilib, federal budjet taqchilligi 2025 yilda 1,17 trillion rublni, 2026 yilda - 2,18 trillion rublni, 2027 yilda - 2,76 trillion rublni tashkil qiladi.
Federal budjet qonuni davlat ichki qarzining yuqori chegarasini belgilaydi - 2026 yil 1 yanvar holatiga ko‘ra 29,4 trillion rubl. Ushbu sanada davlat tashqi qarzining yuqori chegarasi 61,1 milliard dollarni tashkil qiladi, 2025 yil boshiga qadar Milliy farovonlik jamg‘armasi hajmi 11,06 trillion rublni (yalpi ichki mahsulotning 5,2 foizini) tashkil qiladi. 2025 yilda inflatsiya 4,5 foizdan, 2026 va 2027 yillarda esa 4 foizdan yuqori bo‘lmasligi prognoz qilinmoqda.
2025 yilda federal budjetdan ta’limga 600,2 milliard rubl, sog‘liqni saqlashni rivojlantirishga 1,55 trillion rubl, fuqarolarni ijtimoiy qo‘llab-quvvatlash uchun 3,49 trillion rubl ajratiladi.
Qonun 2025 yilda «Milliy mudofaa» sarlavhasi ostida harbiy xarajatlar uchun 13,5 trillion rubl (yoki Rossiya yalpi ichki mahsulotining 6,31 foizi) ajratilishini nazarda tutadi. Bu Rossiyaning zamonaviy tarixidagi rekord darajadagi harbiy xarajatlardir. 2026-2027 yillarda harbiy xarajatlar biroz past bo‘ladi: mos ravishda 12,8 trillion rubl va 13,1 trillion rubl.
«Milliy xavfsizlik va huquqni muhofaza qilish» sarlavhasi ostidagi xarajatlar, ya’ni huquqni muhofaza qilish organlarining ishi uchun 2025 yilda 3,5 trillion rublni tashkil qiladi. «Milliy mudofaa» moddasi bilan birgalikda bu federal budjetda barcha xarajatlarning 41 foizini tashkil qiladi.
Urush va xavfsizlik kuchlariga sarflangan mablag‘lar ta’lim, sog‘liqni saqlash, ijtimoiy siyosat va milliy iqtisodiyotga sarflangan umumiy xarajatlardan ko‘p.
