Davlat fuqarolik xizmatidagi vakansiyalar portalida keltirilishicha, Britaniya hukumatining Yevropa Ittifoqi va xalqaro iqtisodiy munosabatlar bo‘yicha ikkinchi doimiy kotibi lavozimini egallaydigan shaxsga yiliga 153 ming funtdan 200 ming funtgacha maosh taklif etiladi.

Da’vogarlardan arizalar 8 dekabr oqshomigacha qabul qilinadi.

Vakansiya tavsifida yozilishicha, tanlab olingan nomzod Buyuk Britaniya hukumatining YeI bilan munosabatlarida yetakchi rol o‘ynaydi, qator masalalar, xususan savdo, xavfsizlik va chegara siyosatida Buyuk Britaniyaning “asosiy manfaatlari”ni himoya qilish uchun javobgar bo‘ladi.

Bo‘lajak amaldor – bosh vazirning Yevropa Ittifoqi bilan munosabatlar bo‘yicha bosh maslahatchisi, Bryussel bilan muzokaralarda “katta va shaxsiy vakili” bo‘lishi qayd etilgan.

Eslatib o‘tamiz, 2016 yildan boshlab Britaniyada Yevropa Ittifoqidan chiqish shiori ostida ketma-ket bir nechta konservativ hukumatlar hokimiyatga kelgan va ular 2020-21-yillarda bunga erishgandi.

So‘rovlar shuni ko‘rsatadiki, britaniyaliklarning ko‘pchiligi hozir Brexit'dan afsusda. Ilgari Yevropa Ittifoqidan chiqish tarafdori bo‘lganlarning salmoqli qismi hozirga kelib o‘z fikrini o‘zgartirgan.

2024 yil iyulida Starmer boshchiligidagi leyboristlar hokimiyatga keldi. Ular Yevropa Ittifoqi bilan munosabatlarni “qayta tiklashga” va’da bergan, ammo ittifoqqa qayta qo‘shilishni ilgari surmagan.

Oktyabr oyida Starmer Bryusselga birinchi tashrifini amalga oshirib, Yevropa Komissiyasi prezidenti Ursula fon der Leyyen bilan muzokara o‘tkazgan.