Amerikalik investor Skott Bessent prezident Donald Trampning yangi ma’muriyatida AQSh moliya vaziri lavozimini egallashi mumkin. Saylangan prezident 22 noyabr, juma kuni Bessentning ushbu lavozimga tanlanishini o‘zining Truth Social ijtimoiy tarmog‘idagi sahifasida e’lon qildi.

Oq uy sobiq rahbarining so‘zlariga ko‘ra, Bessent «dunyodagi yetakchi xalqaro investorlardan biri hamda geosiyosiy va iqtisodiy strateglardan biri sifatida keng hurmatga sazovor» va uzoq vaqtdan beri Amerika sanoati va «Birinchi navbatda Amerika» siyosati tamoyillarining ashaddiy tarafdori bo‘lib kelgan.

«Skott mening AQSh raqobatbardoshligini oshiradigan va adolatsiz savdo nomutanosibligiga barham beradigan siyosatimni qo‘llab-quvvatlaydi, o‘sishni birinchi o‘ringa qo‘yadigan iqtisodni yaratishga harakat qiladi, ayniqsa bizning kelajakdagi energiya ustunligimiz orqali», — dedi Tramp.

62 yoshli Bessentning muhim siyosiy lavozimlarda tajribasi yo‘q — u hozirda Key Square Management investitsiya fondini boshqaradi, deya ta’kidlaydi Forbes. 2011 yildan 2015 yilgacha u magnat Jorj Soros tomonidan asos solingan investitsiyalarni boshqarish bo‘yicha eng yirik fondlardan biri bo‘lgan Soros Fund Management'da bosh investitsiya direktori lavozimida ishlagan. Soros Fund Management, boshqa narsalar qatorida, butun dunyo bo‘ylab fuqarolik jamiyati guruhlariga moliyaviy yordam ko‘rsatadigan Soros kompaniyalari guruhi bo‘lgan «Ochiq jamiyat» jamg‘armalarining qator loyihalariga mablag‘ ajratdi. Rossiya Federatsiyasida ushbu kompaniyalar guruhi ko‘pincha «Soros jamg‘armasi» deb nomlanadi.

Bessent Oq uy sobiq rahbarini siyosatchining har ikkala saylovoldi kampaniyasida ham qo‘llab-quvvatlagan, u AQSh iqtisodiga qarashlari bo‘yicha respublikachilarga o‘xshaydi, biroq o‘z yondashuvida ancha mo‘’tadil hisoblanadi, deydi kuzatuvchilar. Xususan, investor Tramp tomonidan va’da qilingan, Yevropa Ittifoqida joriy etilishi kutilayotgan AQShga import qilinadigan mahsulotlar uchun bojlar oshirilishini zarurat emas, balki muzokaralarda «ta’sir kuchi» deb hisoblaydi. Shu bilan birga, Bessent respublikachining qayta saylanishi allaqachon ijobiy ta’sir ko‘rsatgan kriptovaluta bozoriga juda ijobiy munosabatda.

Tramp sobiq kongressmen Daffini transport vaziri lavozimiga taklif qildi

AQShning saylangan prezidenti Donald Tramp o‘z ma’muriyatida transport vaziri lavozimiga sobiq kongressmen, hozirda teleboshlovchi bo‘lgan Shon Daffini nomzodini ilgari surdi. 18 noyabr kuni bu lavozimga nomzodini e’lon qilar ekan, Tramp Vakillar palatasida «fiskal mas’uliyat» uchun kurashgan Daffining ishini yuqori baholadi.

Donald Trampning so‘zlariga ko‘ra, Viskonsin shtatidan sobiq kongressmen Kongressdagi hamkasblari bilan yo‘llar va ko‘priklar qurish bo‘yicha muhim loyihalar ustida ishlagan va vazir sifatida u uchuvchilar va havo harakatini nazorat qiluvchilar o‘rtasida irqiy xilmaxillikni qo‘llab-quvvatlash dasturlarini bekor qiladi. «U Amerikaning avtomobil yo‘llari, tunnellari, ko‘priklar va aeroportlarini modernizatsiya qilishda sifat, malaka, raqobatbardoshlik va go‘zallikni birinchi o‘ringa qo‘yadi», dedi Oq uyning bo‘lajak rahbari.

Daffi 2011 yildan 2019 yilgacha AQSh Kongressi Vakillar palatasi a’zosi bo‘lib ishlagan.

Hozirda 53 yoshli to‘qqiz farzandning otasi Shon Daffi Fox Business telekanalida boshlovchi bo‘lib ishlaydi va o‘ta konservativ Fox News telekanali bilan hamkorlik qiladi, u yerda Trampning mudofaa vaziri lavozimiga nomzodi Pit Hegset dasturlarni olib boradi.