Rossiyaning Ukrainaga keng ko‘lamli bostirib kirishi boshlanganidan buyon janglarda kamida 78 329 nafar rossiyalik harbiy halok bo‘ldi. Bu raqam 15 noyabr, juma kuni VVS rus xizmati tomonidan e’lon qilindi, u «Mediazona» va ko‘ngillilar jamoasi bilan birgalikda ochiq ma’lumotlar asosida halok bo‘lgan rossiyaliklarni sanab chiqmoqda. Ushbu ro‘yxatga faqat o‘limlari haqida ochiq xabar berilgan Rossiya harbiy xizmatchilari kiradi. «Ayni paytda bizning Rossiya qabristonlari, urush yodgorliklari va nekrologlarni tahlil qilishimiz haqiqiy o‘lim sonining 45 foizdan 65 foizgacha bo‘lgan qismini qamrab olishi mumkin», deb yozadi nashr mualliflari.
Urush boshlanganidan beri o‘lim holatlarining eng yuqori ko‘rsatkichi
Jurnalistlarning qayd etishicha, Ukrainadagi urushda halok bo‘lgan rossiyaliklarning tasdiqlangan sonida hozirgi o‘sish sur’ati keng ko‘lamli bosqin boshlanganidan beri eng yuqori ko‘rsatkichga yetdi. Ularning ma’lumotlariga ko‘ra, 2024 yilning sentabr, oktyabr va noyabr oylaridagi ko‘rsatkichlar o‘tgan yilning shu oylaridagi ma’lumotlardan bir yarim baravar, 2022 yilga nisbatan esa ikki baravar ko‘pdir.
Xususan, sentabr oyida har kuni o‘rtacha 140 nafar harbiy xizmatchining halok bo‘lgani tasdiqlandi, ularning ba’zilari esa ancha oldinroq vafot etgan: ba’zi nekrologlarda o‘lim sanasi yilning birinchi yarmi yoki oldingi yillarga to‘g‘ri kelgan. «Ehtimol, so‘nggi oyda biz o‘limlar sonining biroz yuqoriroq foizini qayd eta boshladik, bu o‘tgan yil davomida Vuhledar yaqinida vafot etgan, ammo bedarak yo‘qolganlar ro‘yxatiga kiritilgan rus askarlarining jasadlari bilan izohlanadi. Aftidan, Vuhledar qo‘lga olingandan so‘ng, rus harbiylari ularning qoldiqlarini topishga yoki ularning o‘limini qayd etishga muvaffaq bo‘lishdi», deyiladi materialda.
Kursk oblastida kamida 13 nafar rossiyalik muddatli harbiy xizmatchi halok bo‘ldi
Kursk oblastida, Ukraina Qurolli kuchlari (UQK)ning hujumi boshlanganidan so‘ng, ushbu mintaqada kamida 13 nafar rossiyalik muddatli harbiy xizmatchi halok bo‘ldi. Bu haqda 14 noyabr kuni OAV xabarlari va ijtimoiy tarmoqlarda chop etilgan nekrologlarga asoslanib, «Verstka» nashri yozdi.
Nashr ma’lumotlariga ko‘ra, halok bo‘lgan harbiy xizmatchilarning o‘rtacha yoshi - 20 yosh, eng kichigi 18 yoshda bo‘lgan. Halok bo‘lganlarning barchasi turli mintaqalardan: Oltoy va Krasnodar o‘lkasidan, Boshqirdiston va Udmurtiston respublikalaridan, shuningdek, Belgorod, Vologda, Leningrad, Penza, Pskov, Rostov, Sverdlovsk, Chelyabinsk va Yaroslavl oblastlaridan.
