Shimoliy Koreyadan qochganlar guruhi Rossiyaga Ukrainaga qarshi urushda qatnashish uchun yuborilgan KXDR harbiy xizmatchilari orasida tashviqot ishlarini olib borish uchun Ukrainani materiallar bilan ta’minladi. Varaqalar va audioyozuvlar Ukrainaning Seuldagi elchixonasiga yetkazildi, deb xabar berdi 11 noyabr, dushanba kuni Yonhap agentligi.
Materiallarda dezertirlikka chaqiruvlar va tegishli ko‘rsatmalar mavjud. Mualliflar - KXDR armiyasining sobiq askarlari va Shimoliy Koreya harbiy xizmatchilarining ota-onalari.
Zelenskiyga psixologik urush tavsiya etilyapti
Tashabbus guruhi rahbari xuddi shunday varaqalar va Ukraina prezidenti Volodimir Zelenskiyga Belgiya poytaxtida ukrainalik harbiy amaldorlarga Shimoliy Koreya kuchlariga qarshi psixologik operatsiyalarni qo‘llash tavsiya etilgan xatni topshirishi kutilmoqda. Shu kabi usullardan foydalangan holda, Ukraina armiyasi «Shimoliy Koreya askarlari orasida ommaviy taslim bo‘lish va dezertirlikka» erisha oladi, deb yozadi agentlik maktubdan parchalarni keltirib.
Moskva va Pxenyan o‘rtasidagi harbiy hamkorlikka munosabat
AQSh, Janubiy Koreya va Ukraina Shimoliy Koreyaning Rossiyaga jo‘natilgan qo‘shinlari sonini 8-12 ming kishi deb hisoblamoqda. Birlashgan Millatlar Tashkiloti bosh kotibi Antoniu Guterrish Shimoliy Koreya askarlarining Rossiyaning Ukrainaga qarshi urushida ishtirok etishini «juda xavfli eskalatsiya» deb hisoblaydi. NATO bosh kotibi Mark Ryutte Moskva va Pxenyanni Shimoliy Koreyaning Ukrainaga qarshi urushda ishtirok etishidan tiyilishga chaqirdi. Vashington Pxenyanga bosim o‘tkazishni so‘ragan Xitoy esa Rossiya va KXDR o‘rtasidagi munosabatlar mustahkamlanishini «ularning shaxsiy ishi» deb atadi.
Janubiy Koreya va Yevropa Ittifoqi Shimoliy Koreya askarlarining Rossiya Federatsiyasiga o‘tkazilishini qoraladi, Germaniya esa Ukrainadagi urushni qo‘llab-quvvatlagani uchun Shimoliy Koreyaga sanksiyalar bilan tahdid qildi. Ukraina prezidentining so‘zlariga ko‘ra, KXDR harbiylari Ukraina bilan chegaradagi Kursk oblastida allaqachon yo‘qotishlarga duchor bo‘lmoqda.
