Qamchiq dovonidan o‘tgan xalqaro avtomobil yo‘lida yuk mashinasida yong‘in sodir bo‘lgan. Bu haqda IIV YHXBB axborot xizmati xabar bermoqda.

Hodisa bugun, 2024 yil 3 noyabr kuni soat 14:30 larda sodir bo‘lgan. Qamchiq dovonidan o‘tuvchi A-373 avtomobil yo‘lining 226-kilometrida "Vodiy-Toshkent" yo‘nalishida harakatlanayotgan yuk avtomobilida qisqa tutashuv sababli yong‘in yuzaga kelgan.

“Ayni vaqtlarda FVV xodimlari tomonidan yong‘inni o‘chirish choralari ko‘rilmoqda. Harakat xavfsizligi YPX xodimlari tomonidan to‘liq ta’minlanmoqda. "Vodiy-Toshkent" yo‘nalishida vaqtinchalik harakat to‘xtatilgan. Yong‘in o‘chirilgach, harakat to‘liq ochiladi”, deyiladi xabarda.

Qayd etilishicha, hodisada hech kim tan jarohati olmagan va halok bo‘lmagan.