Suv toshqinidan katta zarar ko‘rgan Valensiya chekkasidagi Payporta shahrining yuzlab aholisi hukumat amaldorlarining tashrifi chog‘ida norozilik namoyishi o‘tkazdi, deb xabar berdi Reuters.

Ba’zi namoyishchilar Ispaniya qiroli Filipp va qirolicha Letisiyaga loy otgan. Bosh vazir Pedro Sanches ham hujumga uchragan, u zudlik bilan evakuatsiya qilingan.

Namoyishchilar «Qotillar!» deb hayqirgan va qirol oilasidan shu vaqtgacha qayerda bo‘lganini, nega oldinroq kelmaganini so‘ragan. Xabarga ko‘ra, qirol oilasi a’zolari «xotirjamlikni saqlab», mahalliy aholi bilan gaplashishga harakat qilgan.

Oxirgi ma’lumotlarga ko‘ra, Ispaniyada suv toshqinlari oqibatida 217 kishi halok bo‘lgan, o‘nlab kishilar hanuz bedarak yo‘qolgan.