Qozog‘iston Moliya vazirligi davlat organlariga o‘z xodimlarini mukofotlash uchun mablag‘larni ichki hisobraqamlarga o‘tkazishni taqiqladi. Bu haqda mamlakat moliya vaziri Madi Takiyev ma’lum qildi.

«Agar davlat organida iqtisod qilingan mablag‘lar bo‘lsa, u pullarni mukofot sifatida o‘tkaza olmaydi. Ushbu pullar budjetga qaytariladi», — deydi Takiyev.

Shu bilan birga, u davlat xizmatchilariga ichki manbalardan mukofot beriladimi degan savolga ham javob qaytargan.

«Mukofot bo‘lmaydi. Biz pullarni mukofotga yo‘naltirish mumkin bo‘lgan 112 kodini yopdik», — deya qo‘shimcha qildi vazir.

Avvalroq hukumatda o‘tkazilgan brifingda Takiyev prezident, bosh vazir va parlament spikerlarining daromad hamda mol-mulk bo‘yicha deklaratsiyasi «ishining o‘ziga xosligi» sabab jamoatchilikka e’lon qilinmasligini aytgan edi. Shuningdek, vazirning so‘zlariga ko‘ra, ushbu ro‘yxatga Milliy xavfsizlik qo‘mitasi, IIV va boshqa kuch tuzilmalarining rahbarlari ham kiritilgan.

Jurnalistning «moliya vaziri joriy yilda o‘z deklaratsiyasini e’lon qilishga tayyormi?» degan savoliga Takiyev 2025 yilni kutishni maslahat bergan. U 1 yanvardan boshlab o‘z daromad va xarajatlarini e’lon qilishini bildirgan.