Britaniya Ukrainaga Rossiya agressiyasini qaytarishda qo‘llab-quvvatlash uchun yangi kredit va’da qildi. Buyuk Britaniya Kiyevga Rossiyaning Ukrainaga qurolli hujumidan so‘ng muzlatib qo‘yilgan Rossiya aktivlaridan tushgan foyda evaziga 2,26 milliard funt sterling (2,71 milliard yevro) miqdorida kredit berishni rejalashtirmoqda, deyiladi Britaniya hukumati 22 oktyabr, seshanba kuni e’lon qilgan bayonotda.
Bu miqdor G7 mamlakatlari tomonidan kelishilgan Ukraina uchun 50 milliard dollarlik paketning Britaniya ulushidir. Britaniyaning yangi krediti havo hujumidan mudofaa tizimlari, artilleriya va boshqa qurollarni sotib olishni moliyalashtirish uchun ishlatilishi mumkin. Buyuk Britaniya mudofaa vaziri Jo Xilining ta’kidlashicha, uning mamlakati tomonidan ajratilgan kredit faqat harbiy maqsadlar uchun mo‘ljallangan va undan uzoq masofali raketalarga qaraganda uzoqroq masofani bosib o‘ta oladigan dronlarni yaratish uchun foydalanish mumkin.
Ukraina Britaniyaning Storm Shadow uzoq masofali raketalarini sotib olish uchun pul ishlata oladimi, degan savolga, Xili shunday dedi: «Ular uzoq masofali uchuvchisiz samolyotlardan foydalanishni juda faol ravishda kengaytirmoqda».
YeI Ukraina uchun mablag‘ doirasida 18 mlrd yevro ajratishga tayyor
Yevropa Ittifoqi Ukraina uchun xalqaro kredit doirasida taxminan 18 milliard yevro ajratishga tayyor. Bu haqda Germaniya moliya vaziri Kristian Lindner 22 oktyabr kuni Nyu-Yorkka tashrifi chog‘ida aytib o‘tdi.
«Biz bu hafta Ukrainani qo‘llab-quvvatlash borasida muvaffaqiyatga erishish arafasidamiz», — deya Lindner so‘zlarini keltirgan dpa agentligi.
Germaniya Moliya vazirligi rahbari Vashingtonning hissasi taxminan 20 milliard dollarni (taxminan 18,5 milliard yevro) tashkil etishi mumkinligi uchun AQShga minnatdorchilik bildirdi.
Iyun oyida «Katta yettilik»ning barcha davlatlari garov sifatida G‘arb mamlakatlarida muzlatib qo‘yilgan Rossiya aktivlaridan tushgan mablag‘lardan foydalangan holda yil oxirigacha Ukrainaga umumiy qiymati 50 milliard dollar (46 milliard yevro) miqdorida kredit berishga tayyorligini tasdiqladi.
