O‘zbekistonlik kanoechi Shohmurod Xolmurodov doping tufayli diskvalifikatsiya qilindi. Bu haqda Uznada milliy antidoping agentligi xabar berdi.

Qayd qilinishicha, sportchidan musobaqa davrida olingan doping sinamasida taqiqlangan «Klomifen» moddasi borligi aniqlangan. Xolmurodov Butunjahon antidoping kodeksiga ko‘ra 3 yil muddatga diskvalifikatsiya qilingan.

Sportchidan qaysi musobaqada doping sinama olingani, uning jazo sanasi qachondan hisoblanishi va mahrum qilingan mukofotlari haqida ma’lumot berilmagan.

Shohmurod Holmurodov 2023 yilda Xitoyning Hanchjou shahrida o‘tgan XIX Osiyo o‘yinlarida kanoeda eshkak eshish bo‘yicha 1000 metrga suzish bahsida Nurislom To‘xtasin o‘g‘li bilan birga juftlik bahslarida oltin medalni qo‘lga kiritgan edi.

Xolmurodovning murabbiyi Serik Merbekov so‘zlariga ko‘ra, undan 2024 yil 7 martdagi o‘quv mashg‘ulot yig‘inida doping nazorati bo‘yicha analiz olingan. 1 aprelda test javobi chiqqan va uning qonida «Klomifen» moddasi borligi aniqlangan, ya’ni doping Osiyo o‘yinlari vaqtida aniqlanmagan.

Doping tufayli diskvalifikatsiya qilingan sportchining xalqaro va milliy toifadagi musobaqalar va o‘quv-mashg‘ulot yig‘inlarida ishtirok etishi taqiqlanadi. Agar yuqoridagi talablar bajarilmagan taqdirda ushbu shaxsga umrbod diskvalifikatsiya muddati qo‘llanilishi mumkin. Shuningdek, kodeksda sport federatsiyasi yoki assotsiatsiyasiga nisbatan ham jazo chorasi qo‘llash mumkinligi belgilangan.