Dunyo bo‘ylab Ukrainaning 60 dan ortiq xorijiy diplomatik muassasalari minalashtirish haqida anonim xatlar oldi. Bu haqda Ukraina tashqi ishlar vazirligi 14 oktyabr, dushanba kuni ma’lum qildi va ularning umumiy soni o‘sishda davom etayotganini qo‘shimcha qildi. Xuddi shunday xabarlar Ukraina tashqi ishlar vazirligining tarkibiy bo‘linmalariga ham yuborildi.

Shu munosabat bilan vazirlik rahbari Andrey Sibiga Ukraina diplomatik muassasalarida xavfsizlik choralarini kuchaytirishni buyurdi. Diplomatlar zaruriy xavfsizlik tekshiruvlarini o‘tkazish uchun qabul qiluvchi davlatlarning huquq-tartibot organlari va rasmiylari bilan yaqin aloqada.

«Alohida hollarda diplomatik muassasalar fuqarolarga konsullik xizmatlarini qisqa muddatga to‘xtatib qo‘yishga majbur bo‘ldi», deb ta’kidladi vazirlik va tekshiruvlar tugagandan so‘ng ular darhol tiklanganini qo‘shimcha qildi.

Vaziyat Ukraina diplomatik tizimi va xorijiy diplomatik muassasalar faoliyatiga ta’sir qilmadi. Ish odatdagidek davom etmoqda, barcha belgilangan vazifalar to‘liq bajarilmoqda, deya ishontirdi idora.

Zelenskiy ukrain qurollarini ishlab chiqarishni kengaytirish niyatida

Ukraina prezidenti Volodimir Zelenskiy Rossiyaga qarshi mudofaa urushi olib borayotgan mamlakatda qurol ishlab chiqarishni sezilarli darajada kengaytirish uchun G‘arb sarmoyasidan foydalanishni nazarda tutmoqda. «Sanoat quvvatimiz bizga mamlakatimiz moliyaviy imkoniyatlaridan ko‘ra ko‘proq dron, snaryad va harbiy texnika ishlab chiqarishga tayyor, — dedi u 12 oktyabr kuni kechqurun videomurojaatida. — Ammo shu bilan birga, ular obektiv sabablarga ko‘ra qurol ta’minotida yordam bera olmaydi — o‘z qurollari yo‘q, lekin bizga moliyalashtirishda yordam berishlari mumkin».

Zelenskiy ayni paytda Ukrainaning mudofaa harakatlariga yordam berish uchun ishlatilishi mumkin bo‘lgan «ayrim hamkorlarda» mavjud «maxsus texnologiyalar» haqida ham aytib o‘tdi. Aynan shunday investitsiyalar evaziga Ukraina allaqachon, birinchi navbatda, o‘zining uchuvchisiz uchoqlari ishlab chiqarishini sezilarli darajada oshirishga muvaffaq bo‘ldi, dedi prezident.

«Hozir Fransiyada hamkorlikning yangi modelini – davlatimiz hududida Ukraina-Fransiya qo‘shma ishlab chiqarish quvvatlarini yaratishni muhokama qildik, bu mudofaa vazirliklari darajasida ishlab chiqilmoqda», — deya davom etdi Zelenskiy. U «Daniya modeli» amalga oshirilganini eslatib, bunda hamkor davlat hukumati qurol ishlab chiqarishga investitsiyalarni jalb qilishini bildirdi. Zelenskiyning so‘zlariga ko‘ra, Ukrainada yangi qurol ishlab chiqarish quvvatlarini yaratish va tashkil etish bo‘yicha hamkorlikning o‘xshash fransuz modeli hozirda mamlakatlar mudofaa vazirliklari tomonidan muhokama qilinmoqda.