Hindiston kosmik tadqiqot tashkiloti (ISRO) Venera sayyorasini o‘rganishga oid rejalarini e’lon qildi, deb xabar beradi India Today.

Shukrayaan-1 nomini olgan missiya 2028 yilning 29 mart kuni start oladi.

Kosmik apparatga Veneragacha bo‘lgan masofani bosib o‘tish uchun 112 kun kerak bo‘ladi. Uni uchirish uchun kuchli ISRO LVM-2 tashuvchi raketasidan foydalaniladi. Rejalarga ko‘ra, orbital apparat belgilangan joyga 2028 yilning 19 iyulida yetib boradi.

Hindiston hukumati ushbu ulkan kosmik missiyani amalga oshirishga 150 million dollarga yaqin mablag‘ ajratishga oid budjetni tasdiqladi. Hozirda Hindiston Oy va Mars bo‘yicha tadqiqot tajribasiga ega.

Eslatib o‘tamiz, 2023 yilning yozida Hindiston Oyga kosmik kemasini muvaffaqiyatli uchirgan edi. Hindiston kosmik dasturi 1960 yillardan beri mavjud. Dastlab koinotga sun’iy yo‘ldoshlarni uchirishga e’tibor qaratildi. Mamlakat endi o‘z oldiga yanada ulkan maqsadlarni qo‘ymoqda.

Avvalroq Xitoy 2028 yilga borib Marsdan Yerga namunalarni olib kelish bo‘yicha tarixiy urinishni amalga oshirishi mumkinligi to‘g‘risida xabar berilgandi. «Tyanven-3» missiyasining asosiy vazifasi Marsda hayot izlarini qidirishdan iborat. Bundan tashqari missiya sayyora yuzasiga qo‘nish va undan ko‘tarilishda ilg‘or texnik imkoniyatlarini namoyon etishi kutilmoqda.