AQSh Milliy to‘fonlar markazi (NHC) ma’lum qilishicha, «Helen» to‘foni Qo‘shma Shtatlar janubi-sharqida «halokatli, tarixiy suv toshqini»ga sabab bo‘ldi. 29 sentabr, yakshanba kuni AQShda sodir bo‘lgan tabiiy ofat natijasida, so‘nggi ma’lumotlarga ko‘ra, 63 kishi halok bo‘ldi. Mamlakatda elektr ta’minotidagi uzilishlar qayd etiluvchi Amerikaning PowerOutage.us portali ma’lumotlariga ko‘ra, uch milliondan ortiq xonadon elektr energiyasiz qolgan.

Florida, Jorjiya, Janubiy Karolina, Tennessi va boshqa shtatlar «Helen» tufayli yuzaga kelgan vayronagarchilikdan ayniqsa jabr ko‘rgan. AQSh vitse-prezidenti Kamala Harris shunday ogohlantirish bilan chiqdi: «To‘fon xavfli va halokatli bo‘lib qolmoqda, qurbonlar va suv toshqini xavfi hamon yuqori darajada».

Kasalxona tomidan 50 kishining dramatik qutqarilishi

Tennessi shtatining Ervin shahrida politsiya va qutqaruvchilar shifoxona tomiga chiqib ketgan 50 dan ortiq odamni vertolyot yordamida qutqarishga muvaffaq bo‘ldi. Ular qutqarilishidan bir necha soat oldin senator Bill Xegerti AQSh rasmiylarini suv bilan o‘ralgan odamlarga resurslar yetkazishga chaqirdi va vaziyatni «juda og‘ir» deb atadi.

«Helen» to‘foni 26 sentabr kuni Floridaga yopirildi, so‘ng qo‘shni shtatlarga ko‘chdi. Shamol tezligi soatiga 225 kilometrgacha yetdi va to‘fon to‘rtinchi toifaga («o‘ta xavfli») kiritildi.