Qozog‘istonning Aqto‘be viloyatida yashovchi fuqaro o‘zining ichki organlarini 9 million tengega (18,8 ming dollar) sotishga urindi.

Aqto‘be viloyati prokuraturasi ma’lumotlariga ko‘ra, xodimlar internet makonini monitoring qilish davomida qozog‘istonlik fuqaroning o‘z ichki organlarini sotish bo‘yicha noqonuniy kelishuvga erishmoqchi bo‘lganidan xabar topgan.

«25 sentabr kuni prokuratura tashabbusi bilan o‘tkazilgan tezkor-qidiruv tadbirida o‘zining ichki organlarini jami 9 million tengega sotish bo‘yicha noqonuniy bitim tuzmoqchi bo‘lgan fuqaro Ye. ushlandi», — deyiladi xabarda.

Holat yuzasidan Jinoyat kodeksining tegishli moddalari bilan tergovga qadar tekshiruv harakatlari olib borilmoqda.

Qozog‘istonda 5 sentabrdan «Odam savdosiga qarshi kurashish to‘g‘risida»gi qonun kuchga kirgan, uning doirasida Jinoyat kodeksiga jinoyatlarning yangi toifasi — odam savdosi bilan bog‘liq jinoyatlar, shuningdek, «jinsiy xarakterdagi boshqa xizmatlar» degan yangi tushuncha kiritilgan.