Hozirda Germaniyada qochqinlar, boshpana izlovchilar yoki rad etilgan boshpana izlovchilar sifatida ro‘yxatga olingan 3,5 million xorijlik bor, ular mamlakatda qolishadi, chunki hozircha deportatsiya qilinishi imkonsiz. Bu yangi maksimal ko‘rsatkich, deb yozadi Neue Osnabrücker Zeitung gazetasi 20 sentabr, juma kuni Germaniyadagi xorijliklar markaziy reyestri ma’lumotlariga tayanib.

Hujjatda aytilishicha, 2024 yilning birinchi yarmi oxiriga kelib, Germaniyada gumanitar sabablarga ko‘ra boshpana so‘rab murojaat qilgan xorijliklarning uch toifasidan biriga mansub 3,48 million kishi yashagan. Bu 2023 yil oxiriga nisbatan 60 mingga ko‘pdir. Oxirgi marta bunday ko‘rsatkich Germaniyada 1950-yillarda kuzatilgan, deyiladi Germaniya hukumatining Bundestagdagi so‘l partiya fraksiyasi so‘roviga javobida, u jurnalistlar uchun taqdim etildi.

Qayd etilishicha, ro‘yxatga boshqalar qatori 1,18 million ukrainalik qochqin ham kiritilgan. 2023 yil oxiridan buyon ularning soni 45 ming kishiga oshdi.

Shu bilan birga, Germaniyadan chiqarib yuborilishi kerak bo‘lgan xorijliklar soni biroz kamaydi. 2024 yil o‘rtalarida 226 882 kishi bo‘lgan bo‘lsa, 2023 yil oxirida 15 760 kishiga ko‘proq qayd etilgan. Shu bilan birga, Germaniyada qochqinlik maqomini olish huquqiga ega bo‘lmagan xorijliklarning 80,5 foizi o‘z vatanlaridagi vaziyat zudlik bilan deportatsiya qilishga imkon bermasligi asosida vaqtincha shu yerda qolmoqda, deya aniqlik kiritiladi maqolada.