Germaniya Rossiya gazi taqchilligini bartaraf eta oldi, dedi Germaniya iqtisodiyot va iqlimni muhofaza qilish vaziri Robert Xabek 18 sentabr, chorshanba kuni Quyi Saksoniyaning Osnabryuk shahri aholisi bilan uchrashuvda. «Endi gaz taqchilligi yo‘q. Gaz omborlari to‘lgan», dedi u va yangi qurilgan suyultirilgan tabiiy gaz (STG) terminallari tufayli mamlakat yetarli zaxira quvvatiga ega ekanligini qo‘shimcha qildi.
Shu bilan birga, vitse-kansler ham bo‘lgan Xabek gaz narxi Rossiyaning Ukrainaga keng ko‘lamli hujumidan oldingi darajadan hamon yuqori ekanligini, ammo 2022 va 2023 yillardagidek katta emasligini tan oldi. «Rossiya Federatsiyasidan keladigan gaz quvur gazi edi, lekin suyultirilgan gazni tashish kerak, uni sovitish, kemaga yuklash va okean orqali jo‘natish uni qimmatroq qiladi», deb tushuntirdi vazir.
«Gaz shantaji»
2022 yilning yozida Rossiyaning «Gazprom» konserni ta’mirlash ishlari zarurligini bahona qilib, avvaliga «Shimoliy oqim 1» quvuri orqali Germaniyaga gaz yetkazib berishni sezilarli darajada qisqartirdi, keyin esa butunlay to‘xtatdi. Shu bilan birga, Rossiya kompaniyasi Rossiyaning Ukrainaga keng ko‘lamli hujumi munosabati bilan Yevropa Ittifoqining Kremlga kiritgan sanksiyalarini asos qilib, gaz quvurining ishlashi uchun zarur bo‘lgan ta’mirlangan turbinani Germaniyadan olishdan bosh tortdi.
«Gaz shantaji» va keyinchalik «Shimoliy oqim» tarmoqlarida sodir bo‘lgan diversiyalar fonida Germaniya muqobil yonilg‘i yetkazib beruvchilarni izlay boshladi — ulardan eng muhimi Norvegiya bo‘lib, u Rossiyadan yetkazib berish cheklovlaridan keyin Germaniyaning gaz taqchilligini to‘ldirdi.
