Facebook ijtimoiy tarmog‘ining egasi Meta kompaniyasi «Rossiya segodnya» xalqaro media-guruhi, RT telekanali va «ular bilan bog‘liq boshqa tashkilotlar»ga uning ilovalaridan butun dunyo bo‘ylab foydalanishni taqiqladi. Meta'ning 16 sentabr, dushanba kuni davlat ommaviy axborot vositalarini bloklash haqidagi bayonoti Reuters agentligi tomonidan keltirilgan.
«Ehtiyotkorlik bilan o‘ylab ko‘rganimizdan so‘ng, biz Rossiya davlat ommaviy axborot vositalariga nisbatan choralarimizni kengaytirdik», — deyiladi kompaniya bayonotida. Shuningdek, qaror ularning «chet el aralashuvi bilan bog‘liq faoliyati»ga aloqador ekani aytiladi.
Meta ilovalariga Facebook, Instagram, WhatsApp va Threads kiradi.
AQSh Moliya vazirligi sanksiyalari
13 sentabr kuni AQSh Moliya vazirligi tarkibiga RT kiruvchi «Rossiya segodnya» media-guruhi va uning bosh direktori Dmitriy Kiselevga qarshi yangi sanksiyalar joriy etilgani haqida e’lon qildi.
4 sentabr kuni Vashington RT telekanali va uning bir qator yuqori lavozimli xodimlariga, jumladan, bosh muharrir Margarita Simonyanga qarshi sanksiyalar joriy etgani ma’lum bo‘ldi. Jazo choralari «Moskvaning 2024 yilgi AQSh prezidentlik saylovlariga ta’sir o‘tkazishga urinishlari»ga javoban joriy qilingan», deya tushuntirdi AQSh Moliya vazirligi.
AQSh hukumati RT telekanalini Rossiya razvedkasi uchun ishlaganlikda aybladi
AQSh razvedkasi Rossiya hukumati tomonidan moliyalashtiriladigan RT xorijiy telekanali (sobiq Russia Today nomi bilan mashhur) nafaqat tashviqot bilan shug‘ullanayotganini, balki butun dunyo bo‘ylab Rossiya razvedka operatsiyalarida faol ishtirok etishini aniqladi. Bu haqda 13 sentabr kuni AQSh davlat kotibi Entoni Blinken ma’lum qildi, deb yozadi CNN.
AQSh Davlat departamenti ma’lumotlariga ko‘ra, bir yildan ko‘proq vaqt oldin Rossiya hukumati RT tarkibida turli mamlakatlarda razvedka ma’lumotlarini to‘playdigan va ularda ta’sir qilish operatsiyalarini o‘tkazuvchi, jumladan, u yerdagi saylovlarga ta’sir o‘tkazishga harakat qiluvchi bo‘linmani yashirincha o‘rnatgan. Vashington Moldovada «dushman ta’siri kampaniyasi»ni misol qilib keltirdi, u yerda kuzda prezidentlik saylovlari va Yevropa Ittifoqiga qo‘shilish bo‘yicha referendum bo‘lib o‘tadi.
Bundan tashqari, RT Ukrainada jang qilayotgan rossiyalik askarlar uchun qurol-yarog‘ va jihozlar sotib olish uchun mablag‘ yig‘ishni tashkil qildi, dedi AQSh davlat kotibi. Uning so‘zlariga ko‘ra, natijada Rossiya qurolli kuchlari «snayper miltiqlari, qurol-yarog‘lar, zirhlar, tungi ko‘rish moslamalari, dronlar, radiotexnika, nishonga olish vositalari va dizel generatorlarini» oldi.
AQSh Moliya vazirligining ta’kidlashicha, Rossiya hukumat idoralari AQShdagi «saylov jarayonlariga ishonchni susaytirish» va ularning natijalariga ta’sir qilish uchun sun’iy intellekt texnologiyalari, dipfeyklar va dezinformatsiyadan foydalanmoqda. Oq uy Milliy xavfsizlik kengashining strategik aloqalar bo‘yicha koordinatori Jon Kirbi aytishicha, RT Rossiya prezidenti Vladimir Putinni xabardor qilgan holda ishlamoqda.
YeI Yevropada RT ko‘rsatuvlarini taqiqladi
2022 yil 2 fevralda Lisenziyalash va nazorat qilish komissiyasi (ZAK) - Germaniyadagi radio- va tele-dasturlar davlat regulyatori - RT DE telekanalining Germaniyada translatsiyasini taqiqlab, kanalning mamlakatda translatsiya qilish uchun litsenziyasi yo‘qligini tushuntirdi, u esa amaldagi «Germaniyada ommaviy axborot vositalarini tartibga solishni modernizatsiya qilish to‘g‘risidagi davlat qonuni»ga muvofiq talab qilinadi.
2022 yil 1 martda YeI kengashi Yevropa Ittifoqida jamoat tartibi va xavfsizligiga tahdid soluvchi ommaviy axborot vositalari sifatida RT English, RT UK, RT Germany, RT France, RT Spanish va Sputnik translatsiyasini taqiqlash to‘g‘risida qaror qabul qildi.
