Rossiya Federatsiyasining Ukraina bilan chegaradosh Kursk oblasti Rilskiy va Xomutovskiy rayonlarida chegaradan 15 kilometr uzoqlikda va undan ham yaqinroqda joylashgan aholi punktlaridan tinch aholini majburiy evakuatsiya qilish amalga oshiriladi. Bu haqda 16 sentabr, dushanba kuni region gubernatori Aleksey Smirnov ma’lum qildi.
«Mahalliy aholining chiqib ketish jarayonini muvofiqlashtirish xavfsizlik kuchlari, mahalliy ma’muriyat va «Patriot» Kursk markaziga yuklangan. Hurmatli yurtdoshlar, sizdan hozirgi vaziyatga to‘g‘ri munosabatda bo‘lishingizni va barcha tavsiyalarga amal qilishingizni so‘rayman», — deb yozdi Smirnov Telegram-kanalida.
Ukraina BMT va XQXQni Kursk oblastida huquqni himoya qilishga jalb etadi
Ukraina hukumati esa BMT va Xalqaro Qizil Xoch qo‘mitasiga Ukraina qurolli kuchlari nazorati ostidagi Kursk oblasti hududida gumanitar sa’y-harakatlarga qo‘shilish iltimosi bilan murojaat qildi. Ukraina tashqi ishlar vaziri Andrey Sibiga 16 sentabr kuni ertalab X ijtimoiy tarmog‘ida: «Ukraina ularning ishiga hissa qo‘shishga va xalqaro gumanitar huquqqa sodiqligini isbotlashga tayyor», deb yozdi.
Bir necha kun oldin Rossiya Federatsiyasi Kursk oblasti Sudja shahri va Sudja rayoni aholisining qarindoshlari Rossiya va Ukraina prezidentlariga, shuningdek, ikki davlat ombudsmanlari Tatyana Moskalkova hamda Dmitriy Lubinetsga iltimos bilan murojaat qilishdi. Ular tinch aholini hududdan olib chiqish uchun gumanitar koridor tashkil etish va aholini evakuatsiya qilish bo‘yicha muzokaralarni boshlashga chaqirdi.
«11 sentabr kuni Rossiya armiyasi Sudjaga hujum boshladi, agar Ukraina qurolli kuchlari shaharda himoyalanishga qaror qilsa, tinch aholining omon qolish ehtimoli minimaldir», — deydi maktub mualliflari. Ularga ko‘ra, Ukraina armiyasi nazorati ostidagi Kursk oblasti aholi punktlarida kamida 698 nafar tinch aholi qolmoqda. «Bular asosan ketishga ulgurmagan va evakuatsiyasi tashkil etilmagan keksa odamlardir», - deyiladi xabarda.
Ukraina qurolli kuchlarining Kursk oblastidagi hujumi
Ukraina qurolli kuchlari 6 avgust kuni Rossiya Federatsiyasining Kursk oblasti hududiga hujum boshladi. Prezident Zelenskiy operatsiyani Rossiya hududida «bufer zona» yaratish zarurati bilan izohladi. Uning fikricha, Ukraina qurolli kuchlarining Kursk oblastidagi hujumi rus qo‘shinlarining rejalashtirilgan hujum operatsiyalarini to‘xtatdi, uning maqsadi, ehtimol, Ukraina shimoli-sharqida faol harbiy harakatlar zonasini kengaytirish bo‘lgan.
Shu bilan birga, Kiyev Kursk oblasti aholisiga gumanitar yordam yetkazilishi, Ukraina va Rossiya Federatsiyasiga evakuatsiya qilinishi haqida bir necha bor e’lon qilgan. Sentyabr oyida Rossiya qurolli kuchlari mintaqada qarshi hujum boshladi.
