Zimbabve Atrof-muhit muhofazasi vazirligi hozirda mamlakatda «keragidan ortiq fillar yashayotganini» ma’lum qildi. Shu boisdan ZimParks yovvoyi tabiat bog‘i ma’muriyati o‘ldirilishi kerak bo‘lgan hayvonlarni tanlash bo‘yicha ko‘rsatma oldi, deb yozadi Bild.

Hukumat vakillarining so‘zlariga ko‘ra, bunday yechim tezda o‘sib borayotgan fillar populyatsiyasini nazorat qilishga yordam beradi, shuningdek, ekstremal qurg‘oqchilik oqibatlariga qarshi kurashishni yengillashtiradi.

ZimParks qo‘riqxonasi rahbari Fulton Mangvanyaning AFP agentligiga ma’lum qilishicha, hukumat umumiy hisobda 200 ta fildan qutulish niyatida. Zimbabve Botsvanadan keyin ushbu jonzotlar eng ko‘p yashaydigan mamlakat hisoblanadi — u yerda 100 mingga yaqin fil mavjud. Zimbabveda oxirgi marta fillarni otishga 1988 yilda ruxsat berilgan edi.

Avvalroq Namibiya 700 dan ortiq yovvoyi hayvonlarni, jumladan, fillar, zebralar va begemotlarni o‘ldirishini hamda ularning go‘shtini oziq-ovqat taqchilligidan aziyat chekayotgan odamlarga tarqatishni ma’lum qilgandi. Ushbu choralar suv resurslarini iste’mol qilishni yengillashtirish va qurg‘oqchilik tufayli och qolgan minglab odamlarni go‘sht bilan ta’minlashga qaratilgan. Hukumatning bu boradagi topshirig‘i hayvonlar huquqlari faollari tomonidan qattiq tanqid qilinmoqda.

Zimbabve va Namibiya qurg‘oqchilik tufayli favqulodda holat e’lon qilgan janubiy Afrika davlatlari hisoblanadi.