Yig‘ilish avvalida erishilgan natijalar haqida so‘z bordi.

Ta’kidlanishicha, to‘rt yil avval kambag‘allikni qisqartirish borasidagi ishlar boshlanganida 7,5 million yoki 23 foiz aholining daromadi kambag‘allik chegarasiga yetmas edi. Shu davrda aholimiz 3,7 millionga ko‘paydi, kambag‘allik chegarasi ham tegishli ravishda 1,5 karra oshirildi. 3,5 million odamni daromadli qilish hisobiga 2023 yil yakuni bilan kambag‘allikni 11 foizga pasaytirishga erishildi.

Avvalo, ijtimoiy himoya qamrovi 4,5 karra oshirilib (466 ming oiladan 2,2 millionga), o‘tgan yili bu maqsadlarga 12,3 trillion so‘m ajratildi. Pensiya va nafaqalar miqdori ham 1,5 baravar ko‘paytirildi.

Mahallada kambag‘allikni qisqartirish, tadbirkorlik loyihalariga 35 trillion so‘m arzon kredit, 7 trillion so‘m subsidiya berildi. Mahallalarni obod qilish, bog‘cha, maktab, tibbiyot, yo‘l, suv va elektr infratuzilmasi uchun 120 trillion so‘m ajratildi. Shuningdek, 260 ming gektar yer 800 ming aholi, avvalo yoshlarga dehqonchilik qilish uchun daromad keltiruvchi aktiv sifatida tarqatildi.

Yaqinda mamlakatimizda bo‘lgan BMT Oziq-ovqat va qishloq xo‘jaligi tashkiloti (FAO) bosh direktori bu nafaqat ish o‘rni va daromad, balki oziq-ovqat xavfsizligini ta’minlashda juda to‘g‘ri yo‘l ekanini e’tirof etdi. O‘tgan oyda Kambag‘allikni qisqartirish bo‘yicha xalqaro konferensiyaga kelgan 60 dan ortiq mamlakat ekspertlari O‘zbekiston qisqa muddatda yaratgan tajribani yuqori baholadi.