Yevrokomissiya XXR bilan yuzaga kelgan nohaq raqobat mojarosi doirasida Tesla tomonidan Xitoyda ishlab chiqarilgan elektromobillar hamda bir qancha xitoylik ishlab chiqaruvchilarning elektromobillari uchun antidemping bojlari miqdorini kamaytiradi.
Tesla uchun mo‘ljallangan himoya boji 9 foizdan 7,8 foizga, Xitoyning Geely kompaniyasi uchun esa 19,3 foizdan 18,8 foizga tushiriladi.
Shu bilan birga, BYD avtomobilsozlik kompaniyasi uchun belgilangan 17 foizli stavka saqlab qolinadi, Yevropa Ittifoqi bilan hamkorlik qilishdan bosh tortgan SAIC hamda boshqa kompaniyalar mahsulotlari uchun joriy etilgan 35,3 foizli stavka ham o‘zgarishsiz qoladi. Mazkur bojlar Yevropa Ittifoqiga avtomobillarni olib kirishda undiriladigan odatdagi 10 foizli bojlarga qo‘shimcha hisoblanadi.
Shu bilan birga, XXR Yevrokomissiya bilan savdo va iqtisodiy mojarolarni tartibga solish hamda Xitoyda ishlab chiqarilgan elektromobillar uchun bojlarni kamaytirish bo‘yicha muzokaralar o‘tkazishga tayyorligini tasdiqladi.
«Xitoy har ikki tomonning ham manfaatlariga javob beradigan va Jahon savdo tashkiloti qoidalariga mos keluvchi qarorga kelishda Yevropa tomoni bilan yaqindan hamkorlikni davom ettirishga tayyor», — deyiladi Savdo vazirligi xabarida.
O‘tgan hafta Xitoy savdo tarangligini yumshatish istagini bildirib, Yevropa Ittifoqi tomonidan ishlab chiqarilgan brendlarga antidemping choralarini qo‘llashdan bosh tortishi mumkinligini ma’lum qilgandi.
Xitoyda ishlab chiqarilgan elektromobillarga qo‘llaniladigan bojlar bo‘yicha yakuniy qaror Yevropa Ittifoqining barcha 27 ta davlati tomonidan birgalikda qabul qilinishi kerak.
Avgust oxirlarida AQSh ortidan Kanada ham Xitoyda ishlab chiqarilgan elektromobillar importiga 100 foizlik boj to‘lovi belgilanishini e’lon qilgani to‘g‘risida xabar berilgandi. Bundan tashqari Xitoy po‘lati va alyuminiysiga 25 foiz boj joriy etish rejalashtirilgan.
