Haaga okrug sudi Pokistonning ikki fuqarosini - 56 yoshli Mulla Muhammad Jaloliy va «Tehrik-i-Labbayk Pokiston» radikal o‘ng siyosiy uyushmasining 29 yoshli rahbari Saad Husayn Rizviyni Niderlandiya parlamentidagi eng yirik «Ozodlik partiyasi» rahbari Gert Vildersni o‘ldirishga chaqirishda aybdor deb topdi. NL Times gazetasining 9 sentabr, dushanba kuni xabar berishicha, har ikki ayblanuvchiga ham sudda advokatlar vakillik qilmadilar. Niderlandiya Pokiston bilan ekstraditsiya shartnomasiga ega emasligi sababli, mahkumlar niderland qamoqxonasida qolishi dargumon, deya ta’kidladi NL Times.

Jaloliy qotillikka undashga urinishda ayblangan, chunki u yetakchi sifatida Vildersga qarshi fatvo - nufuzli musulmon arbobining xulosasini chiqargan va buni amalga oshirganlar «oxiratda mukofotlanishiga» va’da bergan, deb yozadi AFP. Unga ko‘ra, mulla 14 yilga ozodlikdan mahrum etilgan. Rizviy esa ijtimoiy tarmoqlarda Vildersni o‘ldirishga chaqirgan. Unga to‘rt yillik qamoq jazosi berildi. «Ko‘pchilik bu gaplarni juda jiddiy qabul qilgan deb taxmin qilish mumkin», — deyiladi sud qarorida. 

Vilders qator keskin bayonotlar bergan

2004 yildan beri Gert Vilders 24 soatlik davlat himoyasida. U qator keskin bayonotlar bergan. 2014 yilda Vilders saylovoldi mitingida marokashliklarni haqorat qilganlikda ayblangan.

2023 yil noyabrida «Ozodlik partiyasi» umumiy saylovlarda g‘alaba qozondi, biroq Vilders hukumatga qo‘shilmadi. U Yevropaga ommaviy migratsiyaning muxolifi, shuningdek, Yaqin Sharqdagi mojaroda kuchli isroilparastlik pozitsiyasini egallaydi. Sentyabr oyida Gert Vilders Ukraina prezidenti Volodimir Zelenskiy bilan uchrashdi. Siyosatchilar Ukrainadagi korrupsiya, Kiyev shartlari bo‘yicha tinchlik o‘rnatish imkoniyatlari va ukrainalik erkaklarning «Ukrainaga yordam berish o‘rniga Niderlandiyada qolishi»ni muhokama qilishdi, deb xabar berdi o‘sha paytda Vildersning o‘zi.