O‘zbekistondagi bir qator ijtimoiy muassasalar xususiy sektorga berilishi mumkin. Bu – 30 avgust kuni imzolangan davlat xususiy sheriklikni rivojlantirish to‘g‘risidagi prezident qarorida ko‘zda tutilgan.

Qarorga ko‘ra, samarasiz foydalanib kelinayotgan yirik shifoxonalar, madaniyat va sport inshootlari (shu jumladan, madaniyat saroylari, stadionlar, konsert zallari, istirohat bog‘lari) xatlovdan o‘tkaziladi.

Xatlov natijalariga ko‘ra, muassasalarni xususiy sektorga davlat-xususiy sheriklik asosida o‘tkazish bo‘yicha 2024 yil oxirigacha Vazirlar Mahkamasiga takliflar kiritilishi kerak.

Ijtimoiy obektlarning “samarasiz foydalanib kelinayotgani”ga qanday baho berilishi hozircha ma’lum emas.

Topshiriq ijrosiga iqtisodiyot va moliya vaziri, sog‘liqni saqlash vaziri, madaniyat vaziri, sport vaziri, Davlat aktivlarini boshqarish agentligi direktori hamda Qoraqalpog‘iston Respublikasi Vazirlar Kengashi rais, viloyatlar va Toshkent shahar hokimlari mas’ul etib belgilandi.

Eslatib o‘tamiz, o‘tgan bir necha yil ichida Toshkentdagi uchta onkologiya shifoxonalari, “Paxtakor” stadioni, Farg‘onadagi “Yoshlar ko‘li” kabi bir qator ijtimoiy maskanlarning sotib yuborilishi jamoatchilik bosimi to‘xtatib qolingan edi. Qolaversa, poytaxtdagi Abdulla Qodiriy va “Do‘stlik” bog‘larining investorga berib yuborilgani ham e’tirozlarga sabab bo‘lgan.