Iste’mol tovarlari ishlab chiqaruvchi dunyodagi eng yirik kompaniyalardan biri bo‘lgan Britaniyaning Unilever konserni xorijiy sarmoyalarni nazorat qilish bo‘yicha hukumat komissiyasidan o‘z biznesini Rossiyada sotish uchun ruxsat oldi, deb xabar berdi RBK agentligi 4 sentabr, chorshanba kuni manbaga tayanib. Ma’lumotni federal amaldor tasdiqladi.
Agentlik suhbatdoshining so‘zlariga ko‘ra, Unilever Rossiya bozorini tark etishiga olib keladigan kelishuv avgust oyi oxirida tasdiqlangan. Kompaniyaning Rossiya biznesi qiymati 35-40 milliard rublga baholanmoqda. Shu bilan birga, 2022 yil oxirida Unilever Rossiyadagi aktivlari 900 million yevroga baholangan (Markaziy bankning joriy kursi bo‘yicha 88 milliard rubldan ortiq). 2023 yil oxirida konsernning Rossiya biznesining bahosi 600 million yevrogacha (59 milliard rubl) kamaydi.
Manbaning ta’kidlashicha, xaridor «aniqlangan, ammo nomi aytilmagan». Unilever kompaniya brendlariga ega bo‘lgan «Yunilever Rus» bo‘linmasini sotadi. U «Magnat» va «Inmarko» muzqaymoq brendlari, «Chistaya liniya», «Barxatnyye ruchki», «Chernyy jyemchug» va boshqalarga bo‘lgan huquqlarga ega. Iyun oyida Unilever Rossiya Federatsiyasida ishlab chiqarilgan xalqaro brendlarining nomlarini ruslashtirishni boshladi. «Domestos», «Sif», «Dav», «Reksona» savdo belgilariga arizalar Rospatentga topshirildi.
Jahon kosmetika bozoridagi yetakchilardan biri
Unilever kosmetika, parfyumeriya va maishiy kimyo jahon bozorida yetakchilardan biri hisoblanadi. Axe, Dove, Rexona, Sunsilk, Knorr, Domestos va boshqa brendlarga egalik qiladi. Unilever Rossiyada 1991 yildan beri faoliyat yuritadi. Kompaniyada uch mingga yaqin ishchi va to‘rtta yirik ishlab chiqarish maydonchasi bor edi.
Rossiyaning Ukrainaga qurolli hujumidan keyin Unilever Rossiya Federatsiyasini tark etmadi. Kompaniya o‘z mahsulotlarini Rossiyaga yetkazib berishni va o‘z hududidan tovarlarni eksport qilishni, shuningdek, Rossiya bozoriga sarmoya kiritishni to‘xtatdi. Shu bilan birga, konsern Rossiya aholisini shaxsiy gigiyena vositalari va mahalliy fabrikalarda ishlab chiqarilgan mahsulotlar bilan ta’minlashni davom ettirishga va’da berdi.
RBK manbasining taxmin qilishicha, aktivlarni sotish to‘g‘risidagi qarorga «o‘sib borayotgan geosiyosiy keskinlik va kompaniya bosim ostidagi holati» ta’sir qilgan bo‘lishi mumkin. 2023 yil iyul oyida Ukraina korrupsiyaning oldini olish milliy agentligi Unilever’ni «urush homiylari» ro‘yxatiga kiritdi.
