Niderlandiya Ukrainaga 200 million yevrodan ortiq yangi keng ko‘lamli yordam paketini taqdim etadi. Bu haqda 2 sentabr, dushanba kuni Zaporijjyaga tashrif buyurgan Niderlandiya bosh vaziri hamda bosh razvedka va xavfsizlik xizmati sobiq rahbari Dik Sxof ma’lum qildi. 

«To‘plam asosan energetika infratuzilmasini himoya qilish va ta’mirlashga qaratilgan bo‘lib, gumanitar yordam uchun qo‘shimcha mablag‘ ajratishni o‘z ichiga oladi», — deb yozdi vazirlar mahkamasi rahbari X ijtimoiy tarmog‘ida. 

«Ukrainaliklar frontdan bir necha o‘nlab kilometr uzoqlikda joylashgan shaharda qanday yashab, o‘z vatanlarini qo‘llab-quvvatlashda davom etayotganini ko‘rish aqlbovar qilmas narsadir», dedi u va yerostida joylashgan maktabga tashrif buyurganini, o‘quv yili boshlanishiga bag‘ishlangan yig‘ilishda ishtirok etganini qo‘shimcha qildi. «Bolalar va o‘qituvchilar doimiy ravishda bomba va dron tahdidiga qanday dosh berishlarini tasavvur qilish qiyin», deya qo‘shimcha qildi Sxof. Shuningdek, u bir qator faxriylar bilan urushda o‘tgan vaqtlari, ruhiy salomatlik muhimligi haqida gaplashganini aytdi.

«Ukrainadagi odamlar erkin va xavfsizlikda yashash huquqiga ega. Rossiyaning Ukrainaga hujumlarini to‘xtatish Niderlandiyaning ham, butun Yevropaning ham xavfsizlik manfaatlariga to‘g‘ri keladi», - deya ta’kidladi Ukrainaga birinchi marta tashrif buyurgan Niderlandiya bosh vaziri. 

Niderlandiya Ukrainaga Rossiya uzra F-16'dan foydalanishga ruxsat berdi 

Ukraina Rossiya hududida Niderlandiyadan olingan F-16 qiruvchi samolyotlaridan foydalanishi mumkin. Niderlandiya qurolli kuchlari qo‘mondoni Onno Eyxelsxaym 29 avgust kuni NOS milliy teleradiokompaniyasiga bergan intervyusida shunday dedi: "Biz F-16 samolyotlaridan foydalanish va parvoz masofasiga hech qanday cheklovlar qo‘ymadik".

Eyxelsxaymning so‘zlariga ko‘ra, xuddi shu narsa Niderlandiya tomonidan yetkazib berilgan boshqa qurollarga ham tegishli - Ukraina qurolli kuchlari agar bu xalqaro gumanitar huquq tamoyillariga mos kelsa, ularni jang maydonida «o‘z xohishiga ko‘ra» tasarruf etishi mumkin. «Biz Ukraina urushda g‘alaba qozonishini xohlaymiz va buning amalga oshishi uchun barcha sa’y-harakatlarni ko‘ramiz», deb tushuntirdi harbiy amaldor.

Umuman olganda, Niderlandiya Ukrainaga 24 ta F-16 qiruvchi samolyotini topshirishga va’da berdi. Eyxelsxaym ularning qanchasi mamlakatda joylashtirilganini aytmadi.

Ukraina G‘arb tomonidan yetkazib berilgan F-16 qiruvchi samolyotlarini Rossiyaga qarshi ishlatishga tayyorlanmoqda. Bu haqda Ukraina prezidenti Volodimir Zelenskiy 26 avgust kuni ma’lum qildi.

Rossiya hujumlari fonida NATO Ukrainaga yordamni oshirmoqda 

Rossiyaning Ukraina hududiga qilgan ommaviy hujumlaridan so‘ng Shimoliy Atlantika alyansi Kiyevni qo‘llab-quvvatlashni kuchaytirishga tayyor. Bu haqda 28 avgust kuni NATO-Ukraina kengashi yig‘ilishidan so‘ng uning bosh kotibi Yyens Stoltenberg ma’lum qildi.

«Bugun ittifoqchilar Ukrainaga harbiy yordamni oshirayotganini tasdiqladilar, - dedi u. - Ukrainani Rossiyadan himoya qilish uchun zarur bo‘lgan jihozlar va o‘q-dorilar bilan ta’minlashda davom etishimiz kerak». Shu bilan birga, alyans rahbari Kiyevga harbiy yuklarni ko‘paytirish mamlakat mudofaasini ta’minlashning asosiy sharti ekanini ta’kidladi.

Stoltenbergning so‘zlariga ko‘ra, NATO-Ukraina kengashi yig‘ilishida jang maydonidagi voqealar va Ukrainaning ustuvor ehtiyojlari muhokama qilingan. Alyans a’zolari Rossiyaning Ukraina tinch aholisi va infratuzilmalariga qarshi havo hujumlari kuchayganini keskin qoraladi.