Zolingen shahrida uch kishining o‘limiga sabab bo‘lgan hujum ortidan Germaniya federal hukumati xavfsizlik paketini kelishib oldi. U chiqarib yuborilishi kutilayotgan qochqinlar uchun to‘lovlarni to‘xtatish, pichoqlarga nisbatan taqiqni kengaytirish, xavfsizlik kuchlariga qo‘shimcha vakolatlar berish va boshqa choralarni o‘z ichiga oladi. Bu haqda Germaniya ichki ishlar vaziri Nensi Fezer va adliya vaziri Marko Bushman 29 avgust, payshanba kuni bo‘lib o‘tgan qo‘shma matbuot anjumanida aytib o‘tdi.
Noqonuniy qochqinlar ketishga majbur bo‘ladi
Avvalroq Yevropa Ittifoqining boshqa davlatida ro‘yxatdan o‘tgan qochqinlar ijtimoiy imtiyozlardan mahrum bo‘lishi kerak, dedi Fezer. Bushman qo‘shimcha qilganidek, bu noqonuniy muhojirlarga bosim o‘tkazish, ularni hokimiyatga murojaat qilishga yoki o‘z ixtiyori bilan mamlakatni tark etishga majburlash maqsadida qilinmoqda.
Bundan tashqari, Bushmanning fikricha, qurol ishlatgan qochqinlarni chiqarib yuborishni soddalashtirish kerak. Adliya vaziri, shuningdek, «uzrli sabablarsiz» vataniga qaytgan qonuniy qochqinlar, masalan, ta’tilda, Germaniyada himoyalanish huquqidan ham mahrum bo‘lishlari kerakligini aytdi. Qayd etilishicha, bu Ukrainadan kelgan qochqinlarga taalluqli emas.
Bushmanning ta’kidlashicha, huquqbuzarlarni Suriya va Afg‘onistonga deportatsiya qilish bo‘yicha ishlarni mahalliy hukumatlar bilan hamkorlikda davom ettirish kerak. Shuningdek, noqonuniy migrantlarni qaytarish uchun uchinchi davlatlar bilan qo‘shimcha migratsiya shartnomalari tuzish ko‘zda tutilgan. Hujjatda Moldova, Qirg‘iziston, O‘zbekiston, Keniya va Filippin tilga olinadi.
Politsiya masofadan ishlaydigan elektroshokerlar bilan qurollanadi
Huquqni muhofaza qilish organlari ko‘proq huquqlarga ega bo‘ladi. Masalan, ular jinoyatda gumon qilinayotgan yoki qidiruvda bo‘lgan shaxslarni aniqlashga yordam berish uchun yuzni tanib olishda internet ma’lumotlarini biometrik tarzda moslashtira oladi. Politsiyani masofadan ishlaydigan elektroshokerlar bilan jihozlash rejalashtirilgan.
Pichoq olib yurishni taqiqlash
Pichoqlar bo‘yicha, kelajakda «ayrim pichoqlarga umumiy taqiq» kiritilishi kerak, dedi Fezer. Bundan tashqari, ommaviy bayramlar, sport va shunga o‘xshash ommaviy tadbirlarda pichoq olib yurishni to‘liq taqiqlash rejalashtirilgan. «Kelajakda poyezdlar va boshqa uzoq masofali transport vositalarida pichoq olib yurishni ham umumiy taqiqlash shart», - dedi vazir. Federal yerlarga jamoat transportida pichoq olib yurishni to‘liq taqiqlash imkoniyatini berish lozim.
Taklif etilayotgan chora-tadbirlar paketini sentabr oyi boshida federal yerlar va muxolif partiyalar vakillari bilan muhokama qilish rejalashtirilgan. Shundan so‘ng Bundestag va Bundesratda muhokama bo‘lib o‘tadi.
