Amerikalik milliarder, Tesla va Space X asoschisi hamda X mikrobloglar xizmati egasi Ilon Mask 25 avgust, yakshanba kuni Fransiya hukumatini bir kun avval Parijdagi Le Burjye aeroportida qo‘lga olingan Telegram ijtimoiy tarmog‘i asoschisi Pavel Durovni ozod qilishga chaqirdi.
Mask FreePavel heshtegi ostida Durovning amerikalik jurnalist Taker Karlsonga bergan intervyusidan parchani chop etdi. Unda Durov Ilon Mask Twitter ijtimoiy tarmog‘ini sotib olgach, unda yerda so‘z erkinligi bilan bog‘liq vaziyat yaxshilangani haqida fikr bildirgan.
Bundan tashqari, Mask fransuz tilida quyidagi mazmundagi postni chop etdi: «Ozodlik. Ozodlik! Ozodlik?»
Maskning Durovning ushlanishi bilan bog‘liq boshqa postida shunday deyilgan: «Nuqtayi nazar: Yevropada 2030 yil, sizni memga layk qo‘yilgani uchun qo‘lga olishmoqda».
Pavel Durovning qo‘lga olinishiga munosabat
Pavel Durovning Fransiyada qo‘lga olinishi jamiyat va xalqaro ommaviy axborot vositalarida katta rezonansga sabab bo‘ldi.
Shunday qilib, Rossiyaning Parijdagi elchixonasi Fransiya rasmiylariga murojaat bilan chiqdi. «Ular zudlik bilan Fransiya hukumatidan sabablarni tushuntirishni so‘rashdi va uning huquqlarini himoya qilishni ta’minlashni talab qilishdi», - deya ushbu hujjatdan iqtibos keltiradi Rossiyaning «Rosbalt» axborot agentligi.
Rossiyalik ombudsman Tatyana Moskalkovaning aytishicha, Telegram asoschisi ushlanishi «so‘z erkinligi huquqining navbatdagi qo‘pol buzilishi»dir. «Pavel Durov butun dunyo bo‘ylab odamlar o‘rtasida muloqot qilish uchun qulay, sodda va qulay vositani, senzurasiz ma’lumotlarni tarqatish uchun tezkor kanalni yaratdi, albatta, bu ko‘pchilikka yoqmaydi», dedi u.
2018 yil bahorida Rossiya rasmiylari mamlakatda Telegram’ni bloklash jarayonini boshlagan, biroq bu urinishlar natija bermagan. Rossiya Federatsiyasida Telegram’ni bloklashga urinishlar 2020 yil iyun oyida to‘xtatilgan edi.
Reuters eslashicha, Pavel Durov 2014 yilda «hukumatning o‘ziga sotgan «V kontakte» ijtimoiy media platformasida muxolifat sahifalarini yopish haqidagi talablarini bajarishdan bosh tortib, Rossiyani tark etgan».
Rossiyaning Ukrainaga qarshi urushi boshlanganidan ko‘p o‘tmay, 2022 yil aprel oyida Pavel Duorov Forbes jurnalidan uni rossiyalik tadbirkor deb atamaslikni so‘radi.
Shu bilan birga, «Pervyy otdel» inson huquqlari loyihasi xodimi Dmitriy Zair-Bek Telegram’da «Pavel Durovning ushlanishi butun dunyodagi odamlar erkinligiga zarba», degan fikrni bildirdi. «Ishonchim komilki, «kontentning yetarli darajada bo‘lmagan moderatsiyasi» (agar bu rost bo‘lsa, hozircha rasmiy e’lon qilinmagan) ikkinchi darajali masala», - deya ta’kidladi huquq himoyachisi. Unga ko‘ra, Durov aslida Telegram foydalanuvchilarining shaxsiy hayotini himoya qilish istagi uchun va, albatta, razvedka xizmatlari bilan hamkorlik qilmagani uchun ta’qib qilinmoqda. «Xuddi shu sabablarga ko‘ra, Pavel va uning jamoasi mahsuloti Rossiya, Eron, Xitoy va boshqa mamlakatlarda bloklangan».
