AQShning International Business Machines (IBM) kompaniyasi Xitoyda ilmiy-tadqiqot va tajriba-konstruktorlik ixtirolariga oid faoliyatini yakunlab, mingdan ortiq xodimlarini ishdan bo‘shatmoqda, deb xabar beradi SCMP.

Qayd etilishicha, kompaniya China Development Lab va China Systems Lab laboratoriyalarini yopadi, shuningdek, Pekin, Shanxay va Dalyan kabi yirik shaharlardagi xodimlarini ishdan bo‘shatadi.

Jiemian nashri ma’lumotlariga ko‘ra, o‘tgan dam olish kunlari IBM laboratoriyalarida faoliyat yurituvchi xitoylik mutaxassislar kompaniyaning ichki tarmog‘idan uzib qo‘yilgan. Ishchilar qisqartirilishi haqida esa bugun, 26 avgust kuni o‘tkazilgan yig‘ilishda ma’lum qilingan.

«IBM mijozlar manfaati uchun faoliyatini moslashtiradi va bu o‘zgarishlar uning Xitoy hududidagi mijozlarga xizmat ko‘rsatish qobiliyatiga ta’sir ko‘rsatmaydi», — deyiladi xabarda.

IBM — Xitoydagi ish o‘rinlarini qisqartirayotgan transmilliy texnologik gigantlardan biri. Xitoy—Amerika raqobati keskinlashgani bois global kompaniyalar materikdagi o‘z faoliyatini o‘zgartirishga majbur bo‘lmoqda.

Joriy yilda Shvetsiyaning telekommunikatsiya qurilmalarini ishlab chiqaruvchi Ericson hamda dunyoga mashhur Tesla kompaniyalari, bundan tashqari, Amazon va Intel ham Xitoydagi ish o‘rinlarini qisqartirgan edi.